मुंबई : प्रतिनिधी
उद्योगपती मुकेश अंबानी यांच्या ‘अँटिलिया’ निवासस्थानाबाहेर स्फोटकांनी भरलेली गाडी ठेवण्याचा आणि मनसुख हिरेन यांच्या संशयास्पद मृत्यूचा संपूर्ण कट हा तत्कालीन महाविकास आघाडी सरकारला बदनाम करण्यासाठीच रचला गेला होता असा आरोप माध्यमांशी संवाद साधताना नाना पटोले यांनी केला. या प्रसंगी सचिन वाझे, अँटिलिया प्रकरण, केंद्रीय यंत्रणांचा दुरुपयोग, निवडणूक आयोगाची मनमानी आणि ४ ऑक्टोबर रोजी मुंबईत निघणा-या ठाकरे बंधूंच्या संयुक्त महामोर्चाबाबत काँग्रेसची अधिकृत भूमिका स्पष्ट केली.
अँटिलिया प्रकरण आणि सचिन वाझे यांच्या न्यायालयीन घडामोडींवर बोलताना नाना पटोले म्हणाले, सचिन वाझेला जामीन मिळणे किंवा त्याचे सरकारी साक्षीदार होणे, हे होणारच होते. कारण हा संपूर्ण कट पूर्वनियोजित होता. परमबीर सिंग आणि सचिन वाझे यांच्या माध्यमातून मविआ सरकार अस्थिर करण्यासाठी अंबानींच्या घराचा सहारा घेण्यात आला.
नागपूरहून आलेल्या जिलेटिनचे गूढ काय?
गाडीत ठेवण्यात आलेली जिलेटिन नागपूरमधून आणली गेली होती, अशी अधिकृत माहिती सरकारने सभागृहात दिली होती. मग हे जिलेटिन नागपुरातून कोणी पुरवले? त्यामागे कोणाचा हात होता? गाडी लावणारा माणूस दोनच दिवसांत पाण्यात बुडून आत्महत्या करतो असा बनाव कसा रचला गेला? हे सर्व चित्र महाविकास आघाडीची प्रतिमा मलिन करण्यासाठी आणि सत्ता बळकावण्यासाठी तयार केले गेले होते. आज परमबीर सिंग कुठे आहेत, याचा थांगपत्ता नाही आणि वाझे माफीचा साक्षीदार बनण्याच्या तयारीत आहे. यावरून स्पष्ट होते की, सत्तेत बसलेल्यांनी पोलिस अधिका-यांना हाताशी धरून महाराष्ट्राला बदनाम करण्याचे मोठे पाप केले होते
४ ऑक्टोबरच्या महामोर्चात काँग्रेस सहभागी
मुख्य निवडणूक आयुक्त ज्ञानेश कुमार आणि निवडणूक आयोगाच्या ‘एसआयआर’ मोहिमेविरोधात मनसे अध्यक्ष राज ठाकरे आणि शिवसेना पक्षप्रमुख उद्धव ठाकरे यांनी ४ ऑक्टोबर रोजी मुंबईत पुकारलेल्या महामोर्चाला काँग्रेसचा पाठिंबा असून मोर्चात काँग्रेस पूर्ण ताकदीने सहभागी होईल.
