वॉशिंग्टन : वृत्तसंस्था
अमेरिका भारताला ९२.८ दशलक्ष डॉलर्स (अंदाजे रु. ७७५ कोटी) किमतीच्या करारात १०० जेव्हलिन क्षेपणास्त्र प्रणाली आणि २१६ एक्सकॅलिबर प्रोजेक्टाइल स्मार्ट आर्टिलरी विकणार आहे.
यूएस डिफेन्स सिक्युरिटी कोऑपरेशन एजन्सीने सांगितले की, विक्रीसाठी आवश्यक असलेल्या मंजुरी आणि तपशील अमेरिकन काँग्रेसला सादर करण्यात आले आहेत. डीएससीएने म्हटले आहे की ही शस्त्रे भारताला सध्याच्या आणि भविष्यातील धोक्यांना तोंड देण्यास मदत करतील.
जेव्हलिन हे एक पोर्टेबल अँटी-टँक क्षेपणास्त्र आहे जे टाक्या, चिलखती वाहने आणि बंकर नष्ट करण्यासाठी डिझाइन केलेले आहे. हे क्षेपणास्त्र उष्णता ओळखते आणि लक्ष्यांवर हल्ला करते. त्याची रेंज २,५०० मीटर आहे. धूर, धूळ किंवा प्रतिकूल हवामानातही ते लक्ष्यांवर मारा करण्यास सक्षम आहे. भारताला ही उपकरणे आपल्या सैन्यात समाविष्ट करणे सोपे होईल. यामुळे दक्षिण आशिया आणि इंडो-पॅसिफिक प्रदेशातील लष्करी संतुलन बदलणार नाही. याचा अमेरिकेच्या संरक्षण तयारीवर कोणताही नकारात्मक परिणाम होणार नाही. भारत आणि अमेरिकेने ३१ ऑक्टोबर रोजी १० वर्षांच्या नवीन संरक्षण चौकटी करारावर स्वाक्षरी केली. याचा अर्थ असा की पुढील १० वर्षांत, दोन्ही देश त्यांचे सैन्य, संरक्षण उद्योग आणि तांत्रिक सहकार्य अधिक मजबूत करण्यासाठी एकत्र काम करतील.
