वॉशिंग्टन : वृत्तसंस्था
माजी सीआयए अधिकारी जॉन किरियाकू यांनी दावा केला आहे की, पाकिस्तानचे माजी राष्ट्राध्यक्ष परवेझ मुशर्रफ यांनी देशाच्या अण्वस्त्रांचे नियंत्रण अमेरिकेला दिले होते. ते म्हणाले की, अमेरिकेने लाखो डॉलर्सच्या बदल्यात मुशर्रफ यांना विकत घेतले होते.
किरियाकू यांनी स्पष्ट केले की, मुशर्रफ यांच्या कारकिर्दीत अमेरिकेला पाकिस्तानच्या सुरक्षा आणि लष्करी कारवायांमध्ये जवळजवळ पूर्ण प्रवेश होता. किरियाकू यांनी एका वृत्तसंस्थेला दिलेल्या मुलाखतीत हे विधान केले. त्यांनी असेही म्हटले की, मुशर्रफ यांनी दुहेरी खेळ खेळला, एकीकडे अमेरिकेसोबत मैत्रीपूर्ण भूमिका बजावली आणि दुसरीकडे पाकिस्तानी सैन्य आणि अतिरेक्यांना भारताविरुद्ध दहशतवादी कारवाया सुरू ठेवू दिल्या.
माजी सीआयए अधिका-याने असेही उघड केले की, पाकिस्तानी अणुशास्त्रज्ञ अब्दुल कादीर खान यांना अमेरिकेच्या कारवाईपासून वाचवण्यात सौदी अरेबियाने महत्त्वाची भूमिका बजावली. सौदी अरेबियाने अमेरिकेला खान यांचा पाठलाग करू नये असे आवाहन केले, ज्यामुळे अमेरिकेला त्यांची योजना सोडून द्यावी लागली. किरियाकू म्हणाले की, जागतिक शक्तीचे संतुलन बदलत आहे आणि सौदी अरेबिया, चीन आणि भारत त्यांच्या धोरणात्मक भूमिकांना आकार देत आहेत.
