वॉशिंग्टन : वृत्तसंस्था
अमेरिकेवरील अस्थिर कर्जाच्या बोजा वाढत असल्यामुळे इलॉन मस्क यांनी थेट संसदेत ट्रम्प सरकारच्या कर विधेयकाबाबत संताप व्यक्त केला. ते म्हणाले, अमेरिकेच्या संसदेमधील हे एक खर्चाने भरलेले, हास्यास्पद आणि लज्जास्पद विधेयक आहे. माफ करा, पण मी आता ते सहन करू शकत नाही, अशा शब्दांमध्ये उद्योगपती एलन मस्क यांनी ट्रम्प सरकारने सादर केलेल्या नवीन कर विधेयकावर हल्लाबोल केला.
मस्क यांनी ‘एक्स’वर केलेल्या पोस्टमध्ये म्हटलं आहे की, सरकारने सादर केलेले नवीन कर विधेयक हे खर्चाने भरलेले आणि हास्यास्पद आहे. ज्या मतदारांनी विद्यमान सरकारच्या बाजूने मतदान केले त्यांना आता स्वत:ची लाज वाटली पाहिजे. कारण त्यांना माहित आहे की त्यांनी चूक केली आहे. हे विधेयक ‘घृणास्पद’ आहे. त्यामुळे वित्तीय तूट वाढली आहे. माफ करा, पण मी आता ते सहन करू शकत नाही….
२.५ ट्रिलियन डॉलर्सची तुट
मस्क यांनी इशारा दिला की, ट्रम्प सरकारने सादर केलेल्या नवीन कर विधेयकामुळे अमेरिकेची यापूर्वीच असणारी प्रचंड अर्थसंकल्पीय तूट २.५ ट्रिलियन डॉलर्सपर्यंत वाढेल. यामुळे देशावरील अस्थिर कर्जाचा भार आणखी वाढेल. दरम्यान, काही दिवसांपूर्वी मस्क यांनी अमेरिका सरकारच्या सरकारी कार्यक्षमता विभाग ( डीओजीई ) च्या प्रमुखपदाचा राजीनामा दिला आहे. तसेच नवीन कर विधेयकापासून स्वत:ला दूर ठेवले आहे.
