उदगीर : प्रतिनिधी
उदगीर शहरातील नांदेड रोड परिसरात समगे हॉस्पिटलजवळ तसेच उदयगिरी कॉलेजच्या बाजूस सकाळी व संध्याकाळी कॅनमधून दूधविक्री केली जात असुन दुधाच्या दर्जाविषयी व शुद्घते विषयी नागरिकांत प्रश्न नि अन्न व औषध प्रशासन (एफडीए) आणि संबंधित यंत्रणेने तातडीने लक्ष घालावे, अशी मागणी केली आहे.
स्थानिक नागरिकांच्या म्हणण्यानुसार, या ठिकाणी विकल्या जाणा-या दूधाबाबत निकृष्ट दर्जा व दूध नासलेले असल्याच्या तक्रारी वेळोवेळी समोर आल्या आहेत. तसेच तक्रार करणा-या ग्राहकांना काही दूधविक्रेत्यांकडून धमकावले जात असल्याचेही आरोप नागरिकांनी केले आहेत. पांढ-या दूधाच्या काळया धंदयाची स्वतंत्र चौकशी करण्याची मागणी होत आहे.
दूध सर्वसामान्यांच्या दैनंदिन आहारातील अत्यावश्यक पदार्थ असल्याने त्याच्या गुणवत्तेबाबत कोणतीही तडजोड धोकादायक ठरू शकते. त्यामुळे संबंधित विक्रेत्यांकडे आवश्यक परवाने आहेत का, स्वच्छतेचे निकष पाळले जातात का, तसेच विक्रीसाठी येणा-या दूधाची गुणवत्ता आणि शुद्धता काय आहे, याची सखोल तपासणी करण्याची मागणी जोर धरत आहे. अन्न व औषध प्रशासनाने संबंधित ठिकाणी अचानक धाड टाकून दूधाचे नमुने तपासणीसाठी प्रयोगशाळेत पाठवावेत आणि नियमांचे उल्लंघन आढळल्यास दोषींवर कठोर कारवाई करावी, अशी मागणी केली आहे.
