पुणे : प्रतिनिधी
आषाढी एकादशीपासून सुरू होणारा उपवासाचा काळ आता आगामी श्रावण महिन्यापर्यंत अखंड सुरू राहणार आहे. मात्र, यंदा उपवास करणे सर्वसामान्यांच्या खिशाला चांगलेच कात्री लावणारे ठरणार आहे. साबुदाण्यासह शेंगदाणे, इतर उपवासाच्या पदार्थांच्या दरात वाढ झाली आहे.
उपवासासाठी लागणारे पदार्थ साबुदाणा, शेंगदाण्याचे दर वाढले असून गृहिणींचे बजेट कोलमडणार आहे.
आषाढी एकादशीपासून सुरू होणारा उपवासाचा काळ आता आगामी श्रावण महिन्यापर्यंत अखंड सुरू राहणार आहे. मात्र, यंदा उपवास करणे सर्वसामान्यांच्या खिशाला चांगलेच कात्री लावणारे ठरणार आहे. साबुदाण्यासह शेंगदाणे, इतर उपवासाच्या पदार्थांमध्ये वाढ झाली आहे.
बाजारात उपवासासाठी लागणा-या बहुतांश अन्नधान्य, फळे आणि फराळाच्या पदार्थांच्या किमतीत मोठी वाढ झाली आहे गेल्या काही दिवसांत आवक घटल्याने आणि मागणी वाढल्याने किरकोळ बाजारात सर्वच उपवासाच्या साहित्याने उच्चांक गाठला आहे. त्यामुळे भाविकांना आता उपवासासाठीही पोटाला चिमटा घ्यावा लागत असल्याचे चित्र आहे.
साबुदाणा दरात १० ते १५ रुपयांनी वाढ
उपवासाचा मुख्य आधार असलेला साबुदाणा आणि शेंगदाणा यांचे दरही तेजीत आहेत. गेल्या महिन्याच्या तुलनेत साबुदाणा किलोमागे १० ते १५ रुपयांनी महागला आहे, तर चांगल्या दर्जाचा शेंगदाणाही १७५ रुपये किलो आहे. श्रावण संपेपर्यंत दरांमधील ही तेजी कायम राहण्याची शक्यता व्यापा-यांनी व्यक्त केली आहे.
आषाढी एकादशीनंतर श्रावणाचेही उपवास
आषाढी एकादशीला सुरू झालेला उपवासाचा हंगाम पुढील महिनाभर चालणा-या श्रावणात अधिक गडद होणार आहे. श्रावणी सोमवार, मंगळागौर, संकष्ट चतुर्थी यांमुळे उपवास करणा-यांची संख्या मोठी असते. मात्र, यंदा श्रावण सुरू होण्यापूर्वीच बाजारात महागाईची झळ जाणवू लागली आहे.
फळांचे भावही गगनाला
उपवासाला फलाहार करणा-यांनाही महागाईचा फटका बसत आहे. सफरचंद, डाळिंब, आणि केळीच्या भावात २० ते ३० टक्क्यांची वाढ झाली आहे. सफरचंद थेट दोनशे पार गेले असून, आवक कमी असल्याने केळी डझनमागे १० ते २० रुपयांनी महागली आहेत.
तेल-तूपही महागले
उपवासाचे पदार्थ तळण्यासाठी लागणारे शेंगदाणा तेल आणि पॅकबंद तुपाचे दरही स्थिर नसून त्यात किंचित वाढ झाली आहे. शेंगदाणा तेल १७५ ते १९० रुपये लिटर, तर ब्रँडेड तूप ६५० ते ७५० रुपये किलोपर्यंत विकले जात आहे.
