निलंंगा: प्रतिनिधी
निलंगा तालुक्यातील नियमितपणे कर्जाची परतफेड करणा-या शेतक-यांच्या पदरी पुन्हा एकदा निराशाच आली आहे. तालुक्यातील एकूण ३७ हजार ४९ शेतकरी खातेदारांपैकी २८ हजार ९५७ शेतकरी नियमित कर्जदार असून, ८ हजार ९२ शेतकरी थकबाकीदार आहेत. शासनाच्या कर्जमाफी योजनेअंतर्गत ६ हजार ९९६ थकबाकीदार शेतक-यांना कर्जमाफीचा लाभ मिळाला; मात्र प्रामाणिकपणे कर्ज फेडणा-या हजारो शेतक-यांना जाहीर केलेले प्रोत्साहनपर अनुदान अद्याप मिळालेले नाही. १ एप्रिल २०१९ ते जून २०२५ या कालावधीतील शासनाच्या निकषांनुसार पात्र ठरलेल्या थकबाकीदार शेतक-यांचे आधार प्रमाणीकरण करण्यात आले. त्यानंतर निलंगा तालुक्यातील ६ हजार ९९६ शेतक-यांना कर्जमाफीचा लाभ मिळाल्याची माहिती सहाय्यक निबंधक एन. एस. किलचे यांनी दिली. विशेष म्हणजे, नियमितपणे कर्ज घेऊन वेळेत परतफेड करणा-या शेतक-यांची संख्या तब्बल २८ हजार ९५७ आहे. या शेतक-यांनी शासनाच्या आवाहनाला प्रतिसाद देत कर्जाची परतफेड केली; मात्र आता त्यांनाच प्रोत्साहनपर अनुदानासाठी प्रतीक्षा करावी लागत आहे. नियमित कर्जदारांच्या याद्याही मागविण्यात आल्या नसल्याची माहिती असून, त्यामुळे शेतक-यांमध्ये तीव्र नाराजी व्यक्त होत आहे.
‘प्रामाणिकपणे कर्ज भरा’ म्हणणा-या शासनाने प्रामाणिक शेतक-यांनाच प्रतीक्षेत ठेवणे कितपत योग्य?, असा सवाल नियमित कर्जदार शेतक-यांकडून उपस्थित केला जात आहे. थकबाकी ठेवल्यास कर्जमाफी आणि वेळेत कर्ज फेडल्यास केवळ आश्वासन, अशी परिस्थिती निर्माण झाल्याने नियमित कर्जदारांमध्ये संताप आहे. शासनाने जाहीर केलेले प्रोत्साहनपर अनुदान तातडीने वितरित करावे, अशी मागणी निलंगा तालुक्यातील नियमित कर्जदार शेतक-यांतून जोर धरत आहे. अन्यथा भविष्यात नियमितपणे कर्जाची परतफेड करणा-या शेतक-यांमध्येही संभ्रम निर्माण होऊन कर्जशिस्तीवर परिणाम होण्याची शक्यता व्यक्त केली जात आहे.
