खासदार, आमदारांसह वरिष्ठ नेत्यांना दिल्लीत हजर होण्याचे आवाहन
नवी दिल्ली : वृत्तसंस्था
दिल्ली, मुंबईसह देशात सीजेपीच्या आंदोलनाने आजचा दिवस गाजला. या अगोदरच इंडिया आघाडीने निवडणूक आयुक्त आणि केंद्र सरकारविरोधात आंदोलन करून चार दिवस दिल्लीचे वातावरण तापविले. त्यातच आज सीजेपीने जंतरमंतरवर आंदोलन करण्याचा निर्धार केला होता. परंतु आज राजधानी दिल्लीत सर्वत्र धरपकड केली. यामुळे विरोधकांनी मोदी सरकारवर हल्लाबोल केला आहे. त्यातच आता कॉंग्रेसनेही मोठ्या आंदोलनाची तयारी सुरू केली असून, आमदार, खासदारांसह वरिष्ठ नेत्यांना दिल्लीत बोलावले आहे.
काँग्रेसकडून राज्यात आणि दिल्लीत सरकारच्या विरोधात मोठे आंदोलन उभे करण्याची तयारी सुरू आहे. त्याच पार्श्वभूमीवर देशातील काँग्रेसच्या सर्व आमदार, खासदार आणि वरिष्ठ नेत्यांना दिल्लीत उपस्थित राहण्याचे आदेश देण्यात आले आहेत. उद्या संध्याकाळपर्यंत सर्वच आमदार-खासदारांनी दिल्लीत उपस्थित राहावे, असे निर्देश पक्षनेतृत्वाने दिले आहेत. विशेष म्हणजे केवळ महाराष्ट्रच नाही, तर सर्व राज्यांच्या प्रदेशाध्यक्षांनाही दिल्लीत उपस्थित राहण्यासाठी सांगण्यात आले आहे. त्यामुळे पुढील काळात काँग्रसह इंडिया आघाडीचे सरकारविरोधात मोठे आंदोलन उभे राहण्याची शक्यता आहे.
इंडिया आघाडीने मुख्य निवडणूक आयुक्त ज्ञानेश कुमार यांना हटविण्याच्या मागणीसाठी राजधानी दिल्लीत सलग चार दिवस जोरदार आंदोलन केले. तसेच पोलिसांनी रोखताच जागेवरच ठिय्या आंदोलन करून दिल्लीचे वातावरण तापविले. रोजच ठिय्या आंदोलन करतानाच काल राष्ट्रपती द्रौपदी मुर्मू यांची भेट घेऊन मतचोरीचा मुद्दा मांडत ज्ञानेश कुमार यांना हटविण्याची मागणी निवेदनाद्वारे केली. यावेळी इंडिया आघाडीचे नेते उपस्थित होते. दरम्यान, आता कॉंग्रेसने देशात या विरोधात रान उठविण्याचे ठरविले असून, त्या पार्श्वभूमीवर राज्यांतील नेत्यांनाही दिल्लीत येण्याचे निर्देश दिले आहेत.
















