हायकोर्टाचा दणका, परीक्षांमधील गोंधळ संपेना
आता फेरपरीक्षा घ्यावी लागणार
मुंबई : प्रतिनिधी
मुंबई उच्च न्यायालयाकडून १६ ऑगस्ट रोजी लिपिक पदासाठी टंकलेखन परीक्षा ऑनलाईन पद्धतीने राज्यभरात घेण्यात आली होती. मात्र, या परीक्षेमध्ये मोठा गोंधळ झाला. अनेक ठिकाणी तांत्रिक अडचणीमुळे विद्यार्थ्यांना परीक्षा देता आली नव्हती. तांत्रिक अडचणीमुळे संतप्त झालेल्या विद्यार्थ्यांनी आंदोलन केले होते. विद्यार्थ्यांनी त्यांच्या समस्या मांडल्यानंतर सीजेपीचे अभिजीत दीपके यांनी परीक्षा देणा-या उमेदवारांसोबत छत्रपती संभाजीनगरला ठिय्या आंदोलन केले होते. शरद पवारांच्या राष्ट्रवादीचे आमदार रोहित पवार यांनी देखील पाठपुरावा केला होता.
दरम्यान, मुंबई उच्च न्यायालयाने १६ ऑगस्टची ऑनलाइन पद्धतीने घेण्यात आलेली क्लार्क टंकलेखन चाचणी रद्द केली. परीक्षेची नवी तारीख नंतर जाहीर केली जाईल, असे कळविण्यात आले. मुंबई उच्च न्यायालयाच्या क्लार्क म्हणजेच लेखनिक पदासाठी उमेदवारांना ऑनलाईन टंकलेखन चाचणी यशस्वी होणे आवश्यक होते. मात्र, परीक्षा केंद्रावरील विविध अडचणींमुळे आणि इतर अडचणींमुळे म्हणजेच सर्व्हर डाऊन होणे, कीबोर्ड व्यवस्थित न चालणे अशा समस्या विद्यार्थ्यांना आल्या होत्या. यानंतर विद्यार्थ्यांनी छत्रपती संभाजीनगर, कल्याण, वाशिम, हिंगोली यासह विविध ठिकाणी अडचणी आल्याचे सांगितले होते. अखेर मुंबई हायकोर्टाकडून १६ ऑगस्ट रोजी घेण्यात आलेल्या ऑनलाइन टायपिंग टेस्ट परीक्षेला रद्द करण्याचा निर्णय घेतला. या परीक्षेची तारीख लवकरच संकेतस्थळावर कळवली जाईल, असे सांगण्यात आले. १६ ऑगस्ट रोजी घेण्यात आलेली न्यायालयीन क्लार्क पदाची टायपिंग टेस्ट रद्द करण्याचा निर्णय न्यायालय प्रशासनाने घेतला आहे. या निर्णयाचे स्वागत शरद पवारांच्या राष्ट्रवादीचे आमदार रोहित पवार यांनी केले.
परीक्षेत मोठा गोंधळ
उच्च न्यायालयाच्या लिपिक भरतीसाठी घेण्यात आलेल्या टायपिंगच्या परीक्षेत मोठ्या प्रमाणात गोंधळ झाल्याचे निदर्शनास आल्यानंतर उच्च न्यायालयाचे महानिबंधक मुनगंटे आणि महाधिवक्ता मिलिंद साठे यांची भेट घेऊन त्यांच्याकडे संबंधित परीक्षेची टायपिंग टेस्ट रद्द करण्याची विनंती केली होती. त्यानुसार १६ ऑगस्ट रोजी घेण्यात आलेली टायपिंग टेस्ट रद्द करण्यात आली. त्यामुळे मा. न्यायालयीन प्रशासनाचे आभार, असे रोहित पवार म्हणाले.
