अहमदपूर : प्रतिनिधी
सलग दोन महिन्यांपेक्षा जास्त काळ पावसाचा मोठा खंड पडल्यामुळे मरशिवणी व मरशिवणी तांडा परिसरातील सोयाबीन, कापूस आणि तूर ही खरीप पिके पूर्णपणे वाळली असून शेतक-यांचे अतोनात नुकसान झाले आहे. या परिस्थितीची गंभीर दखल घेत दि.२ ऑक्टोबर रोजी ग्रामस्तरीय समितीने प्रत्यक्ष प्रक्षेत्रावर (शेतावर) भेट देऊन पिकांच्या नुकसानीचे पंचनामे करण्यास सुरुवात केली आहे.
यावेळी शासकीय उपाययोजना राबवून शासन आपणास मदत देणार असल्याचे या पाहणीदरम्यान ग्रामस्तरीय समितीने बाधित शेतक-यांशी संवाद साधून त्यांना धीर दिला. पावसाच्या दीर्घ खंडामुळे उद्भवलेल्या या आस्मानी संकटात शेतक-यांनी खचून जाऊ नये. महाराष्ट्र शासन आणि शासकीय कर्मचारी शेतक-यांच्या पाठीशी राहून दुष्काळावर मात करण्यासाठी शासनाने जाहीर केलेल्या सर्व उपाययोजना आणि सवलती प्रत्यक्ष स्तरावर राबवून शेतक-यांना दिलासा दिला जाईल, असा ठाम विश्वास समितीच्या वतीने गावक-यांना देण्यात आला. याप्रसंगी शेतक-यांनी आपले फार्मर आयडी आणि कागदपत्रे दाखल करण्याच्या सूचना ग्राम महसूल अधिकारी अविनाश पवार यांनी शेतक-यांना दिल्या. ज्या शेतक-यांनी अद्याप ‘फार्मर आयडी’ काढलेला नाही, त्यांनी तो तात्काळ काढून घ्यावा. तसेच, ज्या शेतक-यांची जमीन सामूहिक किंवा सामायिक आहे, त्यांनी नियमानुसार आवश्यक असणारी कागदपत्रे त्वरित समितीकडे जमा करावीत, जेणेकरून मदतीचा लाभ मिळण्यात कोणतीही अडचण येणार नाही.
पंचनामा व पाहणीच्या वेळी ग्राम महसूल अधिकारी अविनाश पवार, सहाय्यक कृषी अधिकारी मंचक परतवाघ यांच्यासह संजय गुणाले, प्रभाकर जाधव, रामकिसन आमुगे, गणपत दोडे, उमाकांत गुणाले, पंडित दोडे, थावरु जाधव, बालाजी जाधव, उत्तम राठोड, तुकाराम चव्हाण, गजानन कदम, व्यंकट कदम, हणमंत दोडे, हरिराम श्रीरामे, संतोष पांचाळ, बालाजी गुणाले, ई-पीक पाहणी सहाय्यक इंद्रजित गुंडरे, तुकाराम सांगविकर, श्रीराम आमुगे, धर्मराज कदम, बालाजी गुणाले, मसनाजी आमुगे, बालाजी गुंडरे , भारत राजपंगे, सुभाष दोडे, रामजी श्रीरामे, दिपक जाधव, धर्मराज कदम, हनुमान दोडे, श्रीराम आमुगे, उमाकांत कदम, राजपाल कदम, दत्ता दोडे, राम श्रीरामे, तुकाराम चव्हाण, धनंजय गुणाले, दत्तात्रय दोडे यांच्यासह मरशिवणी व मरशिवणी तांडा येथील शेतकरी व नागरिक उपस्थित होते.
