लातूर : प्रतिनिधी
लातूर जिल्ह्यातून एक अत्यंत मोठी बातमी समोर आली आहे. चाकूर तालुक्यामध्ये विद्यार्थ्यांची वाहतूक करणारी एक स्कूल बस उलटून भीषण अपघात झाला आहे. सांडोळ-महांडोळ मार्गावर ही दुर्घटना घडली असून यामुळे परिसरात काही काळ मोठा आक्रोश बघायला मिळाला.
मिळालेल्या प्राथमिक माहितीनुसार, चाकूर तालुक्यातील सांडोळ-महांडोळ मार्गावर राचन्नावाडी येथील पुण्यश्लोक अहिल्यादेवी होळकर विद्यालयाची स्कूल बस विद्यार्थ्यांना घेऊन जात होती. यादरम्यान अचानक चालकाचे नियंत्रण सुटल्याने ही बस रस्त्याच्या बाजूला जाऊन उलटली. ज्यावेळी हा अपघात झाला तेव्हा बसमधून सुमारे ३० ते ३५ विद्यार्थी प्रवास करत होते.
बस उलटल्यामुळे बसमधील विद्यार्थ्यांमध्ये मोठी घबराट पसरली. घटनास्थळी एकच आक्रोश ऐकायला आला. या अपघातात अंदाजे २२ ते २३ विद्यार्थी किरकोळ जखमी झाले आहेत. अपघाताची माहिती मिळताच स्थानिक नागरिकांनी आणि प्रशासनाने तातडीने मदतकार्य सुरू केले. सर्व जखमी विद्यार्थ्यांना तत्काळ उपचारासाठी चाकूर येथील ग्रामीण रुग्णालयात दाखल करण्यात आले असून, त्यांच्यावर सध्या उपचार सुरू आहेत.
