छत्रपती संभाजीनगर : काही दिवसांपूर्वीच अमरावती जिल्हा स्त्री रुग्णालयात नवजात शिशु कक्षाला लागलेल्या आगीत तीन नवजात बालकांचा होरपळून मृत्यू झाल्याची घटना घडली होती. ज्यानंतर एनआयसीयूमधील उपकरणांची तपासणी करण्यात यावी, असे आदेश देण्यात आले.
परंतु, या घटनेला काही दिवस उलटत नाहीत तोच आता छत्रपती संभाजीनगरच्या एशियन रुग्णालयातील एनआयसीयूला आग लागल्याची घटना शुक्रवारी (४ सप्टेंबर) घडली. आकाशवाणी चौकात असलेल्या एशियन हॉस्पिटलमध्ये पहाटे २.४५वाजेच्या सुमारास ही घटना घडल्यानंतर खळबळ उडाली. आग लागली त्यावेळी एनआयसीयू विभागात ९ लहान मुले उपचार घेत होती. परंतु, तत्काळ सर्व मुलांना बाहेर काढण्यात आल्याने मोठा अनर्थ टळला.
मिळालेल्या माहितीनुसार, एशियन हॉस्पिटलमध्ये पहाटे २.४५ वाजेच्या सुमारास लहान मुलांच्या अतिदक्षता विभागात एसीच्या शॉर्टसर्किटमुळे भीषण आग लागली. सुरुवातीला एनआयसीयूमध्ये असलेल्या एसीमधून धूर येत असल्याचे एनआयसीयूमध्ये असलेल्या रुग्णालय कर्मचा-यांच्या लक्षात आले. ज्यानंतर तत्काळ त्या ठिकाणी असलेल्या डॉक्टर आणि नर्सेसनी मिळून एनआयसीयूतील ९ बालकांना बाहेर काढले. ज्यामुळे मोठा अनर्थ टळला.
