श्रीनगर : वृत्तसंस्था
राष्ट्रीय तपास संस्थेने एका दहशतवादी कटाच्या प्रकरणात शनिवारी सकाळी जम्मू आणि काश्मीरच्या अनेक भागांमध्ये मोठी छापेमारी केली. सुरक्षा दलांनी कुलगाम, गांदरबल आणि बांदीपोरासह खो-यातील एकूण सात ठिकाणी शोधमोहीम राबवली आहे.
पाकिस्तानस्थित दहशतवादी सूत्रधार आणि स्थानिक भूमिगत कार्यकर्त्यांच्या नेटवर्कशी संबंधित प्रकरणाचा तपास करण्यासाठी ही कारवाई हाती घेण्यात आली असून, एनआयएच्या पथकांनी कुलगाममध्ये दोन, बांदीपोरामध्ये तीन आणि सोपोरमध्ये दोन ठिकाणी झाडाझडती घेतली. स्थानिक पोलीस आणि सुरक्षा दलांनी या शोधमोहिमेदरम्यान एनआयएच्या पथकांना पूर्ण सहकार्य केले असल्याची माहिती अधिका-यांनी दिली आहे.
तपास यंत्रणेला संशय आहे की, पाकिस्तानस्थित दहशतवादी सूत्रधारांच्या इशा-यावर काम करणा-या स्थानिक नेटवर्कने खो-यात घुसखोरी करणा-या दहशतवाद्यांना रसद (लॉजिस्टिक्स) आणि इतर प्रकारची मदत पुरवली होती. मूळात हे प्रकरण श्रीनगरमधील जकुरा पोलीस ठाण्यात नोंदवण्यात आलेल्या एफआयआरशी संबंधित आहे. त्यानंतर एनआयएने हे प्रकरण जेएमयूके म्हणून पुन्हा नोंदवून आपल्या हातात घेतले. या प्रकरणात बेकायदेशीर कृत्ये (प्रतिबंध) कायदा, १९६७ च्या कलम २३, शस्त्र कायदा, १९५९ च्या कलम ७ आणि २५ तसेच स्फोटक पदार्थ कायदा, १९०८ च्या कलम ४ अंतर्गत कायदेशीर कारवाई केली जात आहे.
