स्फोटकाचे नमुने गोळा करीत असताना स्फोट
श्रीनगर : वृत्तसंस्था
जम्मू आणि काश्मीरमधील श्रीनगरमधील नौगाम पोलिस स्टेशनमध्ये काल भयावह स्फोट झाला. यात ९ ठार तर ३२ जण जखमी झाले. त्यांच्यावर ९२ आर्मी बेस आणि एसकेआयएमएस सौरा रुग्णालयात उपचार सुरू आहेत. अधिका-यांच्या मते, व्हाईट कॉलर दहशतवादी मॉड्यूल प्रकरणासंदर्भात जप्त केलेल्या स्फोटकांचे नमुने पोलिस गोळा करत असताना हा स्फोट झाला. संपूर्ण ३६० किलो स्फोटके पोलिस स्टेशनमध्ये साठवून ठेवण्यात आली होती की फक्त काही भाग आणला होता हे स्पष्ट नाही.
जम्मू आणि काश्मीरचे डीजीपी नलिन प्रभात यांनी सांगितले की, हा अपघात होता. सॅम्पलिंग दरम्यान हा स्फोट झाला. मृतांमध्ये एक निरीक्षक, तीन फॉरेन्सिक टीम सदस्य, गुन्हे शाखेचे दोन छायाचित्रकार, दोन महसूल अधिकारी आणि एक शिंपी यांचा समावेश आहे. हरियाणाच्या फरिदाबादमध्ये अटक करण्यात आलेल्या डॉ. मुझम्मिल गनईच्या भाड्याच्या घरातून स्फोटके जप्त करण्यात आली. दिल्ली बॉम्बस्फोट प्रकरणात गनई यांना आधीच अटक करण्यात आली.
१० नोव्हेंबर रोजी दिल्लीतील लाल किल्ल्याजवळ झालेल्या कार स्फोटात १३ जणांचा मृत्यू झाला होता. डीजीपींनी सांगितले की, तपासादरम्यान फरिदाबादमधून मोठ्या प्रमाणात स्फोटके जप्त करण्यात आली. जी नौगाम पोलिस स्टेशनमध्ये साठवून ठेवण्यात आली होती आणि त्यांची तपासणी करण्यात येणार होती. डीजीपींनी सांगितले की, ही प्रक्रिया गेल्या २ दिवसांपासून सुरू होती. कारण स्फोटके अत्यंत संवेदनशील स्वरूपाची होती आणि शुक्रवारी रात्री ११:२० वाजता हा स्फोट झाला. हा दहशतवादी हल्ला नसल्याचे त्यांनी सांगितले.
दहशतवादी हल्ला नाही, अपघात
अधिका-यांच्या मते, व्हाईट कॉलर टेररिस्ट मॉड्यूल प्रकरणासंदर्भात जप्त केलेल्या स्फोटकांचे नमुने पोलिस गोळा करत असताना हा स्फोट झाला. डीजीपींनी सांगितले की, हा दहशतवादी हल्ला नव्हता तर एक चूक किंवा अपघात होता ज्यामुळे अनेक लोकांचे जीव गेले. फरिदाबादमधून जप्त केलेली स्फोटके सुरक्षितपणे वाहतूक करण्यात आली आणि पीएसएच्या खुल्या जागेत साठवण्यात आली. प्रक्रियेनुसार ती फॉरेन्सिक तपासणीसाठी पाठवण्यात येणार होती.
