मोठी दुर्घटना, उभ्या टेम्पोला भरधाव कारची धडक
पुणे : प्रतिनिधी
पुणे जिल्ह्यात जेजुरी-मोरगाव रोडवर भरधाव जाणा-या कारने उभ्या टेम्पोला जोराची धडक दिली. या भीषण अपघातात ८ जणांचा जागीच मृत्यू झाला. अपघाताचे वृत्त समजताच पोलिस घटनास्थळी दाखल झाले. जखमींना तातडीने रुग्णालयात दाखल करण्यात आले. मृतांमध्ये कारमधील चौघांचा समावेश आहे. हा अपघात बुधवारी सायंकाळी ७.३० च्या सुमारास घडला.
जेजुरीहून बारामतीकडे निघालेली एक कार उभ्या असलेल्या पिकअप टेम्पोला धडकली. यावेळी पिकअप टेम्पोमधून साहित्य बाहेर काढणारे आणि कारमधील चौघे प्रवासी अशा एकूण ८ जणांचा मृत्यू झाला तर ५ जण जखमी झाले आहेत. जखमींना जेजुरी येथील रुग्णालयात उपचारासाठी दाखल करण्यात आले. या घटनेनंतर जेजुरी पोलिस तात्काळ घटनास्थळी दाखल झाले. घटनेतील जखमींना उपचारासाठी रुग्णालयात हलवण्यात आले आहे. याबाबतचा अधिकचा तपास जेजुरी पोलीस करत आहेत.
जेजुरी-मोरगाव रस्त्यावरील किर्लोस्कर कंपनीजवळील श्रीराम ढाब्यासमोर भरधाव वेगात आलेली कार थांबलेल्या पिकअप टेम्पोला धडक देऊन शेजारीच उभा असलेल्या कारवर आदळली. हा अपघात इतका भीषण होता की, जागेवरच आठ जणांचा मृत्यू झाला तर पाच जण गंभीर जखमी झाले आहेत.
सोमनाथ रामचंद्र वायसे, रामु संजीवन यादव (दोघेही रा. नाझरे कप ता. पुरंदर), अजय कुमार चव्हाण (रा. उत्तर प्रदेश), अजित अशोक जाधव (रा. कांजळे, ता. भोर), किरण भारत राऊत (रा. पवारवाडी, ता. इंदापूर), अक्षय शंकर राऊत (रा. झारगडवाडी, ता. इंदापूर), अश्विनी शंकर ऐसार (रा. नागनसूर हेद्रे, सोलापूर) अशी मृतांची नावे असून अन्य एकाची ओळख पटू शकली नाही.
