पुणे : प्रतिनिधी
कराड तालुक्यातील कोपर्डे हवेली परिसरात भात पिकावर सध्या पानावरील अळी कडा करपा रोगाचा प्रादुर्भाव दिसून येत आहे. शेतक-यांच्या उत्पादन खर्चात आणखी वाढ झाली आहे. पावसाची उघडझाप, त्यानंतर पडणारे कडक ऊन, वातावरणातील बदलामुळे भात पिकावर किडी व रोगांचा प्रादुर्भाव वाढत आहे. संभाव्य नुकसान टाळण्यासाठी शेतक-यांकडून कीटकनाशके, बुरशीनाशकासाठी आवश्यक टॉनिकची फवारणी सुरू आहे.
कोपर्डे हवेली परिसरातील भाताला राज्यभर मागणी आहे, दर्जेदार तांदळाची बाजारपेठेत स्वतंत्र ओळख निर्माण झाली आहे. मात्र, यंदा भात लागवडीपासूनच उत्पादन खर्चात वाढ झाली आहे. मजुरी, खते, औषधे, रोपांची लागवड, चिखलणी, मशागत, पाणी व्यवस्थापनासाठी मोठा खर्च करावा लागत आहे. त्यात आता किडी व रोगांच्या नियंत्रणासाठी फवारणीचा अतिरिक्त खर्च वाढला आहे.
पानावरील अळी पानांच्या पाठीमागील बाजूस अंडी घालते. अळीचा प्रादुर्भाव वाढल्यास पानांचे नुकसान होऊन पिकाच्या वाढीवर परिणाम होण्याची शक्यता आहे. प्रतिकूल हवामानामुळे काही ठिकाणी भात पिकाच्या वाढीवर परिणाम होण्याची शक्यता शेतक-यांकडून व्यक्त होत आहे. त्यामुळे चांगले उत्पादन घेण्यासाठी शेतकरी पिकाची नियमित पाहणी करून आवश्यक फवारणी करत आहेत. उत्पादन खर्च वाढल्याने आगामी काळात भात व तांदळाच्या दरात वाढ होण्याची शक्यता आहे. शेतक-यांना योग्य बाजारभाव मिळणे आवश्यक असल्याचे मत व्यक्त होत आहे.
लागवडी, फवारणी बरोबर मजुरांचे वाढलेले दर जेरीस आणत आहेत. त्यातच उन पावसाच्या खेळामुळे भाताची वाढ खुंटली आहे. यंदा खर्च जास्त आणि उत्पादन कमी अशी परिस्थिती आहे. भाताची वाढ खुंटली असून फुटवा देखील निघाला नाही. उत्पादन खर्च वाढल्यामुळे तांदूळ देखील महागणार, अशी माहिती भात उत्पादक शेतकरी महादेव चव्हाण यांनी दिली.
