नवी दिल्ली : वृत्तसंस्था
दिल्लीला हादरवणा-या बॉम्बस्फोट प्रकरणी तपास यंत्रणांना मोठा आणि धक्कादायक सुगावा लागला आहे. अटक करण्यात आलेला संशयित डॉक्टर मुजम्मिल याच्या मोबाईल कॉल डिटेल रेकॉर्ड्सच्या तपासणीतून डॉक्टरांचे एक मोठे आणि संघटित नेटवर्क उघडकीस आले, ज्याचे धागेदोरे थेट जैश-ए-मोहम्मद या दहशतवादी संघटनेशी जोडलेले आहेत.
दिल्लीतील स्फोट झाल्यापासून तब्बल १२ हून अधिक डॉक्टरांचे मोबाईल फोन नंबर स्विच ऑफ असून ते गायब झाले आहेत. तपास यंत्रणा या सर्व डॉक्टरांचा शोध घेत आहेत. फोन बंद असलेले बहुतांश डॉक्टर हे ‘अल फलाह’ विद्यापीठाशी संबंधित आहेत. या विद्यापीठातून शिक्षण घेतलेल्या किंवा तेथे काम करणा-या डॉक्टरांची एक मोठी यादी तपास यंत्रणांनी तयार केली आहे. पाकिस्तानमधून सूत्रे हलवणारे हँडलर याच डॉक्टरांच्या माध्यमातून दिल्ली आणि आसपासच्या भागाला हादरवण्याचा मोठा कट रचत होते, असे तपासात स्पष्ट झाले आहे.
या विद्यापीठातील डॉक्टर, कर्मचारी आणि विद्यार्थ्यांना ‘काश्मीर बनेगा दारुल इस्लाम’ आणि ‘शरीयत या शहादत’ अशा घोषणांच्या माध्यमातून ‘ब्रेनवॉश’ केले जात होते. ही घोषणा अंसार गझवत-उल-हिंद या दहशतवादी संघटनेची असल्याचे उघड झाले आहे.
या गंभीर प्रकरणात अटक करण्यात आलेल्या डॉ. शाहीन आणि डॉ. परवेज यांच्या सीडीआरमधूनही तपास यंत्रणांना अनेक महत्त्वाचे पुरावे हाती लागले आहेत. फरार असलेल्या या डझनभर डॉक्टरांच्या शोधासाठी विशेष पथके तयार करण्यात आली आहेत.
