नागपूर : प्रतिनिधी
जादूटोणा करून मुलाचा जीव घेतल्याच्या संशयातून एका ७० वर्षीय वृद्ध सास-याने स्वत:च्या सुनेची कु-हाडीने वार करून निर्घृण हत्या केल्याची धक्कादायक घटना यशोधरानगर पोलिस ठाण्याच्या हद्दीतील पिवळी नदी, पाहुणे ले-आउट परिसरात घडली.
मिळालेल्या माहितीनुसार, नत्थूलाल यांच्या मुलाचा २०१९ मध्ये मृत्यू झाला होता. तेव्हापासून सुनेनेच जादूटोणा करून मुलाचा जीव घेतल्याचा संशय नत्थूलाल यांच्या मनात होता. या कारणावरून घरात सतत वाद होत असत. नत्थूलाल नेहमी लक्ष्मीला मारून टाकण्याची आणि स्वत: आत्महत्या करण्याची धमकी देत असे. आरोपीच्या पत्नीची मानसिक स्थितीही ठीक नसल्याचे समोर आले आहे.
शनिवारी दुपारी लक्ष्मी यांची मुलगी नोकरीवर आणि मुलगा घराबाहेर गेला होता. लक्ष्मी घराच्या मागील बाजूस कपडे धुत असताना आरोपीने संधी साधून त्यांच्यावर कु-हाडीने सपासप वार केले. गंभीर दुखापत झाल्याने लक्ष्मी यांचा घटनास्थळीच मृत्यू झाला.
सुनेची हत्या केल्यानंतर आरोपीने घरापासून १०० मीटर अंतरावर असलेल्या विहिरीत उडी घेतली. नागरिकांनी तत्काळ पोलिसांना माहिती दिल्यानंतर यशोधरानगर पोलिसांनी घटनास्थळी धाव घेत स्थानिकांच्या मदतीने नत्थूलालला बाहेर काढले. फुफ्फुसात पाणी गेल्याने त्याची प्रकृती गंभीर असून त्याच्यावर मेडिकल रुग्णालयात उपचार सुरू आहेत. तर घटनास्थळी फॉरेन्सिक पथकाने पुरावे गोळा केले असून सुनेचा मृतदेह शवविच्छेदनासाठी पाठवण्यात आला आहे. यशोधरानगर पोलिसांनी नत्थूलालविरुद्ध हत्येचा गुन्हा दाखल केला आहे.
