शोक प्रस्ताव वाचताना अक्षम्य चुका, टीकेची झोड
मुंबई : प्रतिनिधी
राज्यातील एक महत्त्वाचे पद असलेले महाराष्ट्र विधानसभा अध्यक्ष राहुल नार्वेकर यांनी अधिवेशनाच्या पहिल्या दिवशी सभागृहात दिवंगत मान्यवरांना श्रद्धांजली अर्पण करताना मराठी भाषेची लक्तरे अक्षरश: वेशीवर टांगली. त्यांनी शोक प्रस्तावाच्या वेळी तब्बल २६ चुका केल्या. मराठी भाषेला अभिजात भाषेचा दर्जा प्राप्त झाल्यानंतर विधानसभा अध्यक्ष पदावरील प्रमुख व्यक्तीने अशा प्रकारे मराठी प्रस्तावाचे वाचन केल्याने तीव्र संताप व्यक्त होत आहे. विशेष म्हणजे लिखित शोक प्रस्तावदेखील त्यांना नीट वाचता आला नाही. यावरून त्यांच्यावर टीकेची झोड उठली आहे. हा मराठी भाषेचा अपमान असल्याची टीका होत आहे.
विधानसभा सभापती राहुल नार्वेकर यांनी शोक प्रस्तावाचे वाचन करताना मराठीचे चुकीचे शब्द वापरले. त्यांनी दिवंगत ज्येष्ठ गायिका आशा भोसले यांच्याबद्दलचा शोक प्रस्ताव वाचून दाखविताना तब्बल २६ चुका केल्या. विशेष म्हणजे या प्रस्तावात जे नमूद केले होते. त्यातील शब्दांच्या भावनेचा अक्षरश: चुराडा झाल्याचे त्यांच्या वाचनातून दिसून आले. आशा भोसले यांच्या वडिलांचे नाव दीनानाथ असताना नार्वेकरांनी ते नाव दीनदयाळ असे वाचले.
रसिकांच्याऐवजी रेसिकांच्या, दुर्दम्य अशा शब्दाऐवजी दुर्दमय असा शब्दप्रयोग केला. एवढेच नव्हे तर साधा शृंगार शब्दाचा उच्चारही करता आला नाही. गांभीर्यपूर्वक ऐवजी गंभीरपूर्वक अशा शब्दउच्चार केला. सभागृहातील अध्यक्ष किंवा सभापती यांच्याविषयी टिपण्णी केल्यास हक्कभंग होतो. त्यामुळे त्या गंभीर चुकांवर सभागृहात कुणीही बोलले नाही. परंतु सोशल मीडियासह मराठी जाणकारांनी त्यांच्यावर टीकेची झोड उठविली.
राज ठाकरे यांनीही
व्यक्त केला संताप
मनसेप्रमुख राज ठाकरे यांनी चांगलाच संताप व्यक्त केला. पद्मविभूषण आशाताई भोसलेंच्या निधनाचा शोकप्रस्ताव मांडताना विधानसभा अध्यक्ष राहुल नार्वेकर यांनी ज्या पद्धतीने मराठी भाषेची चिरफाड केली आणि कागदावर लिहून दिलेले मराठी पण त्यांना वाचता येत नाही, हे पाहून संताप, उद्वेग दोन्ही दाटून आला. वाचण्या आधी त्या कागदातून यांनी भेळ खाल्ली होती का? असा संतप्त सवाल राज ठाकरे यांनी उपस्थित केला.
हेडमास्तरांनाच आता
शाळेत घालण्याची वेळ
विधानसभेचे अध्यक्ष म्हणजे हेडमास्तर. पण हेडमास्तरांनाच पुन्हा शाळेत घालण्याची वेळ आली आहे, असा टोला राष्ट्रवादी काँग्रेस पार्टी शरदचंद्र पवार पक्षाच्या महिला प्रदेशाध्यक्षा रोहिणी खडसे यांनी विधानसभेचे अध्यक्ष राहुल नार्वेकर यांना लगावला.
