नाशिक : नाशिक आणि दिंडोरी लोकसभा मतदारसंघाच्या निवडणुकीसाठी २० मे रोजी मतदान होणार आहे. या पार्श्वभूमीवर भाजप उमेदवाराच्या प्रचारासाठी पंतप्रधान नरेंद्र मोदी नाशिक दौ-यावर असून पिंपळगाव येथे ते जाहीर सभा घेणार आहे. या सभेकडे देशाचे लक्ष लागलेले असतानाच लासलगावला कांद्याच्या माळा घालून शेतक-यांनी आंदोलन केले आहे.
दरम्यान, महायुतीच्या उमेदवारांच्या प्रचारासाठी देशाचे पंतप्रधान नरेंद्र मोदी यांच्या पिंपळगाव बसवंत येथील सभेअगोदरच लासलगाव येथे शेतक-यांनी बुधवारी सकाळी कांद्याच्या माळा घालून कांद्याची संपूर्ण निर्यात बंदी हटवण्यासाठी जोरदार घोषणाबाजी करत आंदोलन करण्यात आले.
यावेळी लासलगाव पोलिसांनी कांद्याच्या माळांसह १५ शेतक-यांना ताब्यात घेतले आहे. तर शेतकरी व्हॉट्सअ‍ॅप ग्रुप अ‍ॅडमिन आणि लासलगाव शहर विकास आघाडीच्या अशा एकूण वीस जणांना आतापर्यंत लासलगाव पोलिसांनी नोटिसा बजावल्या आहेत.
