नाशिक : प्रतिनिधी
रेल्वे स्थानकाजवळील जेलरोड पवारवाडीजवळ शनिवारी रात्री कर्मभूमी एक्स्प्रेस या धावत्या रेल्वेमधून पडल्याने दोन प्रवाशांचा जागीच मृत्यू झाला. तर एक जण गंभीर जखमी झाला आहे. मृत व जखमीची ओळख रात्री उशिरापर्यंत पटू शकली नव्हती. मुंबई-लोकमान्य टिळक टर्मिनस येथून निघालेली व बिहार राज्यातील रस्तोलकडे जाणारी कर्मभूमी एक्सप्रेस गाडी क्रमांक १२५४६ ही शनिवारी रात्री आठ वाजून १८ मिनिटांनी नाशिकरोड रेल्वे स्थानकावर आली.
काही वेळाने कर्मभूमी एक्स्प्रेस पुढे निघाल्यानंतर रेल्वे स्थानकाजवळील पवारवाडीजवळील साईनाथ नगर येथील मारुती मंदिराजवळ ही दुर्दैवी घटना घडली. कर्मभूमी एक्स्प्रेस या धावत्या रेल्वेतून पडलेले दोघे गंभीर जखमी होऊन जागीच मयत झाले. या घटनेत आणखी एक प्रवासी रेल्वे खाली पडून गंभीर जखमी झाला आहे. सध्या दिवाळीमुळे रेल्वेला प्रवाशांची मोठी गर्दी आहे.
धावत्या रेल्वेतून तिघेजण खाली पडल्याचे इतर प्रवाशांच्या लक्षात येताच त्यांनी आरडाओरडा केला. त्यामुळे साईनाथ नगर भागातील रेल्वे लाईनजवळ राहणा-या नागरिकांनी घटनास्थळी धाव घेतली. रेल्वे लोको पायलट के. एम. डेरे यांनी या अपघाताची माहिती नाशिकरोड रेल्वेस्थानक उपप्रबंधक कार्यालयात दिली. रेल्वे पोलिस व नाशिकरोड पोलिसांना घटनेची माहिती मिळताच घटनास्थळी धाव घेतली. नाशिकरोडचे वरिष्ठ पोलिस निरीक्षक जितेंद्र सपकाळे यांनी घटनास्थळी भेट देऊन पाहणी केली.
