निलंगा : प्रतिनिधी
मराठा समाजाच्या विविध प्रलंबित मागण्यांसाठी पुकारण्यात आलेल्या लातूर जिल्हा बंदला निलंगा शहरासह तालुक्यात उत्स्फूर्त प्रतिसाद मिळाला. अत्यावश्यक सेवा वगळता शहर व तालुक्यातील दुकाने, आस्थापने आणि व्यावसायिक प्रतिष्ठाने कडकडीत बंद ठेवण्यात आली. निलंगा शहरातील छत्रपती शिवाजी महाराज चौक येथे सकल मराठा समाजाच्या वतीने रास्ता रोको आंदोलन करण्यात आले. यावेळी मराठा आरक्षणाच्या मागण्यांसाठी मनोज जरांगे पाटील यांच्या समर्थनार्थ घोषणाबाजी करण्यात आली.
आंदोलनामुळे काही काळ परिसरात वातावरणात चैतन्य निर्माण झाले. यानंतर सकल मराठा समाजाच्या शिष्टमंडळाने उपविभागीय अधिका-यांना निवेदन देऊन मराठा आरक्षणासंदर्भातील प्रलंबित मागण्या तातडीने मार्गी लावण्याची मागणी केली. हैदराबाद गॅझेट लागू करणे, शिंदे समितीला मुदतवाढ देणे, सातारा-कोल्हापूर गॅझेटची अंमलबजावणी करणे, कुणबी प्रमाणपत्रांचे वाटप करणे, मंत्रालयात स्वतंत्र मराठा कक्ष सुरू करणे तसेच मागण्यांबाबत तातडीने शासन निर्णय काढून त्याची अंमलबजावणी करण्याची मागणी निवेदनातून करण्यात आली.
दरम्यान, अंतरवाली सराटी येथे मनोज जरांगे पाटील यांच्या सुरू असलेल्या उपोषणाच्या पार्श्वभूमीवर सरकारने मराठा समाजाच्या मागण्यांबाबत ठोस निर्णय घ्यावा, अशी मागणी आंदोलकांनी केली आहे. मागण्यांवर तातडीने सकारात्मक निर्णय घेऊन उपोषणाची सांगता करण्यासाठी सरकारने पुढाकार घ्यावा, असेही निवेदनात नमूद करण्यात आले आहे. निलंगा शहरासह तालुक्यात शासकीय कार्यालये, शासकीय व खासगी रुग्णालये, शासकीय व खासगी वाहतूक, पेट्रोल पंप आदी अत्यावश्यक सेवा वगळता बहुतांश आस्थापने बंद ठेवण्यात आली. दुपारनंतर सकल मराठा समाजाच्या वतीने बंद मागे घेऊन आस्थापने सुरू करण्याचे आवाहन करण्यात आले. आंदोलनात सकल मराठा समाजाचे पदाधिकारी व समाजबांधव मोठ्या संख्येने सहभागी झाले होते.
