नांदेड : प्रतिनिधी
केंद्रीय निवडणूक आयोगाच्या तीनही आयुक्तांनी संयुक्तपणे जारी केलेल्या निवेदनामुळे विरोधी पक्षनेते राहुल गांधी आणि त्यांच्या सहका-यांनी निर्माण केलेला फेक नॅरेटिव्ह उध्वस्त झाला आहे, असा दावा खासदार अशोकराव चव्हाण यांनी केला. निवडणूक आयोगातील सर्व प्रक्रिया एकमताने झाल्या असून, आयुक्तांमध्ये कोणताही मतभेद नसल्याचे संयुक्त निवेदनातून स्पष्ट झाल्याचे त्यांनी सांगितले.
नांदेड येथे आयोजित पत्रकार परिषदेत चव्हाण यांनी राहुल गांधी यांच्यावर टीका केली. संविधान हातात घेऊन संवैधानिक संस्थांवर सातत्याने प्रश्नचिन्ह निर्माण करणे योग्य नाही. संविधानाने निर्माण केलेल्या संस्थांवरील जनतेचा विश्वास कमी करण्याचा प्रयत्न केला जात असल्याचा आरोप त्यांनी केला. कॅबिनेट सेक्रेटरींकडे पाठवण्यात आलेले पत्र कोणत्याही धोरणात्मक विषयाशी संबंधित नव्हते, तर डेप्युटेशनवरील नियुक्तीशी संबंधित होते. मात्र, या पत्राला वेगळे स्वरूप देऊन निवडणूक आयोगामध्ये मतभेद असल्याचा आभास निर्माण करण्याचा प्रयत्न करण्यात आल्याचे चव्हाण म्हणाले. फॉर्म क्रमांक ६ संदर्भातही जाणीवपूर्वक संभ्रम निर्माण केला जात असल्याचा आरोप त्यांनी केला. सर्वोच्च न्यायालयाने ज्या स्वरूपातील फॉर्म क्रमांक ६ वैध ठरवला आहे, त्याच स्वरूपात त्याचा वापर केला जात असल्याचे त्यांनी स्पष्ट केले.
पराभव झाला की आरोप
निवडणुकीत विजय मिळाला की निवडणूक आयोग योग्य आणि पराभव झाला की आयोगावर आरोप, अशी भूमिका काँग्रेसने सोडली पाहिजे, असे चव्हाण म्हणाले. तेलंगणा, पंजाब, हिमाचल प्रदेश आणि कर्नाटक येथे विजय मिळाल्यानंतर हाच निवडणूक आयोग योग्य होता; मग भाजप विजयी झाल्यानंतरच आयोगावर प्रश्न का उपस्थित केले जात आहेत, असा सवाल त्यांनी केला. ईव्हीएमबाबतही सातत्याने आरोप करण्यात आले. तर मतचोरी चे आरोप करणा-यांनी आधी आत्मपरीक्षण करावे. जनतेने नाकारल्यानंतर प्रत्येक पराभवाचे खापर निवडणूक आयोगावर फोडणे हा जनतेच्या निर्णयाचा अवमान असल्याचे ते म्हणाले. जनतेचे प्रश्न घेऊन जनतेमध्ये गेल्यास जनता प्रतिसाद देते, असा टोलाही त्यांनी लगावला.
या पत्रकार परिषदेला भाजप महानगराध्यक्ष आ. अमरनाथ राजूरकर, जिल्हा मध्यवर्ती सहकारी बँकेचे अध्यक्ष आमदार डॉ. तुषार राठोड, प्रदेश उपाध्यक्ष चैतन्यबापू देशमुख, महापौर कविता मुळे, जिल्हाध्यक्ष अ‍ॅड. किशोर देशमुख, नांदेड डॉ. संतुकराव हंबर्डे, डॉ. सचिन उमरेकर आणि प्रवक्ते निलेश देशमुख उपस्थित होते.
