बीड : प्रतिनिधी
नीट पेपरफुटी प्रकरणामुळे देशभरात तर खळबळ उडालीच पण लाखो विद्यार्थ्यांची मेहनत, त्यांच्या स्वप्नांचा चुराडा झाला. याप्रकरणाचा तपास सुरू असून सीबीआयच्या तपासात अनेक धागेदोरे समोर येत आहेत. याच पेपरफुटी प्रकरणातील मुख्य सूत्रधार अर्थात मास्टरमाईंड पी. व्ही. कुलकर्णी याला सीबीआयने पुण्यातून अटक केली होती. नॅशनल टेस्टिंग एजन्सीच्या अतिशय गोपनीय अशा प्रश्नपत्रिका तयार करणा-या समितीशी कुलकर्णी हा संबंधित होता, अशी माहिती समोर आली. त्याच्या अटकेने प्रचंड खळबळ माजली.
आता याच पी. व्ही. कुलकर्णीला आणखी एक मोठा धक्का बसला आहे. सध्या तुरुंगाच्या गजाआड असलेल्या पी. व्ही. कुलकर्णी याचे बीड शहरातील शाहूनगर भागात इमारतीचे बांधकाम सुरू आहे. मात्र त्याचे बांधकाम विनापरवाना असल्याचे उघड झाले असून आता त्यावर तोडक कारवाई होणार आहे. नगर परिषद मुख्य कार्यकारी अधिका-यांनी ही माहिती दिली आहे.
बीड शहरामध्ये शाहूनगर भागात एक अनधिकृत बांधकाम, विनापरवानगी बांधकाम सुरू आहे. आणि ते नीट पेपरफुटी प्रकरणातील मुख्य सूत्रधार पी. व्ही. कुलकर्णी यांच्या इमारतीचे बांधकाम आहे. मात्र यासंदर्भात तक्रार प्राप्त झाल्यानंतर नगर परिषदेच्या नगररचना कार्यालय आणि मालमत्ता कर विभागाने पाहणी केली तसेच चौकशीही करण्यात आली.
तेव्हा त्या ठिकाणी गंभीर त्रुटी आणि अनियमितता आढळून आली आहे. त्या बांधकामाची परवानगीची संचिका आम्ही तपासली, मात्र कुलकर्णी याच्या बांधकामासाठी कुठल्याही प्रकारची परवानगी घेण्यात आलेली नाही. तसेच चारही बाजूने नियमानुसार सोडल्या जाणा-या जागेतही बांधकाम करण्यात आले आहे. यामुळे या बांधकामाशी संबंधित सर्व होल्डर्सना नोटिसा बजावून पुढील कारवाई केली जाणार आहे. तसेच तोडक कारवाई देखील केली जाणार आहे, अशी माहिती नगर परिषदेचे मुख्य कार्यकारी अधिकारी शैलेश फडसे यांनी दिली आहे.
