इस्लामाबाद : वृत्तसंस्था
पाकिस्तान आणि अफगाणिस्तान यांच्यात सध्या मोठा वाद चालू आहे. या दोन्ही देशांनी एकमेकांवर हल्ले देखील केले आहेत. यामध्ये दोन्ही बाजूचे सैनिक, सामान्य नागरिक मारले गेले आहेत. दरम्यान, आता पाकिस्तानचे संरक्षणमंत्री ख्वाजा मोहम्मद आसिफ यांनी अफगाणिस्तानला थेट खुल्या युध्दाची धमकी दिली आहे. तुर्की येथील सुरू असलेली चर्चा यशस्वी झाली तर ठीक आहे, नाहीतर थेट युद्ध होईल, असे आसिफ यांनी सांगून टाकले आहे.
सध्या अफगाणिस्तान आणि पाकिस्तान यांच्यात शस्त्रसंधी झाली आहे. या शस्त्रसंधीच्या चार ते पाच दिवसांनीच पाकिस्तानच्या आसिफ यांनी अफगाणिस्तानला ही धमकी दिली. एका मुलाखतीत त्यांनी अफगाणिस्तान सोबतच्या संघर्षावर सविस्तर भूमिका मांडली. अफगाणिस्तानला शांतता हवी आहे. मात्र तुर्की येथे चालू असलेल्या चर्चेत ठोस असं काहीही समोर न आल्यास त्यांच्यासोबत खुले युद्ध करण्याचा आमच्याकडे पर्याय आहे, असे आसिफ यांनी सांगितले आहे. त्यांनी पाकिस्तानी संसदेत याच युद्धावर आपली भूमिका मांडली. यावेळी बोलताना त्यांनी आपल्या भाषणात अफगाणिस्तान दहशतवाद्यांना पोसत आहे, असा दावा केला. सोबतच आम्ही अफगाणिस्तानच्या एकूण ४० लाख निर्वासितांना आश्रय दिला. पण आम्हाला त्या बदल्यात फक्त बंदुकीच्या गोळ्या मिळाल्या, असा हल्लाबोल आसिफ यांनी केला.
सध्या अफगाणिस्तान आणि पाकिस्तान यांच्यात तुर्कीमध्ये शांततेसाठी चर्चा चालू आहे. कतार आणि तुर्की या देशांच्या मध्यस्थीने ही चर्चा चालू आहे. या चर्चेसाठी पाकिस्तानकडून दोन सदस्यीय शिष्टमंडळ तसेच अफगाणिस्तानकडून सहा सदस्यीय शिष्टमंडळाचा समावेश आहे. यामध्ये गृह, संरक्षण, परराष्ट्र मंत्रालयाच्या अधिका-यांचा समावेश आहे.
