पुणे : प्रतिनिधी
एकीकडे भोर तालुक्यातील नसरापूरमधील चिमुकलीवरील अत्याचाराच्या घटनेमुळे राज्यभर संतापाची लाट उसळली असताना पुण्यात तशीच आणखी एक घटना घडली. पुण्यात ५० वर्षीय व्यक्तीकडून ९ वर्षांच्या बालिकेवर अत्याचार करण्याचा प्रयत्न झाल्याचा आरोप पर्वती भागातील नागरिकांनी केला. वेळीच नागरिकांनी ही घटना पाहिल्यामुळे मोठा अनर्थ टळला असल्याची माहिती आहे.
नागरिकांनी संबंधित व्यक्तीला पोलिसांच्या ताब्यात दिले आहे. मात्र पर्वती पोलिस ठाण्याबाहेर आता लोकांनी मोठी गर्दी केली असून लोकांमध्ये मोठा संताप उसळल्याचे दिसून येत आहे. या घटनेबाबत पोलिस नेमकी माहिती देत नाहीत. पर्वती भागात घडलेल्या या घटनेमुळे लोकांमध्ये मोठ्या प्रमाणात संताप व्यक्त केला जात असून लोक पर्वती पोलिस ठाण्याच्या बाहेर गर्दी करत आहेत. एवढी मोठी गर्दी पाहता आता वरिष्ठ पोलिस अधिकारी या ठिकाणी दाखल होत आहेत. यामुळे पर्वती भागातील वातावरण मात्र तणावग्रस्त झाल्याचे दिसत आहे.
पुण्यातील पर्वती परिसरात एका ५० वर्षांच्या व्यक्तीने ९ वर्षांच्या बालिकेवर जबरदस्ती करण्याचा प्रयत्न केला आहे. त्या बालिकेकडे पाहून अश्लील इशारे करण्यात आले आणि जबरदस्तीने तिचे कपडे काढण्याचा प्रयत्न या व्यक्तीने केल्याचा आरोप केला जात आहे. त्यामुळेच स्थानिकांमध्ये मोठा रोष निर्माण झाला आहे.
