नवी दिल्ली : वृत्तसंस्था
दिल्लीच्या राजकारणात पुन्हा एकदा ‘बंगला पॉलिटिक्स’ तापले आहे. मुख्यमंत्री अरविंद केजरीवाल यांच्या कथित नव्या घराच्या फोटोवरून मोठा वाद निर्माण झाला असून, सत्ताधारी आणि विरोधकांमध्ये आरोप-प्रत्यारोपांची मालिका सुरू झाली आहे.
दिल्ली सरकारमधील मंत्री प्रवेश वर्मा यांनी पत्रकार परिषद घेऊन केजरीवाल यांच्यावर जोरदार टीका केली. त्यांनी केजरीवाल यांना ‘दिल्लीचा रहमान डकैत’ असे संबोधत गंभीर आरोप केले. वर्मा यांनी काही फोटो प्रसिद्ध करत दावा केला की, हे फोटो केजरीवाल यांच्या नव्या निवासस्थानाचे आहेत. त्यांच्या मते, लोधी इस्टेटमधील ९४-९५ या भागात केजरीवाल यांनी आलिशान ‘शीशमहल २’ उभारला आहे.
मात्र, आम आदमी पार्टीने हे सर्व आरोप फेटाळून लावले आहेत. पक्षाचे खासदार संजय सिंह यांनी स्पष्टपणे सांगितले की, सोशल मीडियावर व्हायरल होणारे फोटो पूर्णपणे खोटे आहेत आणि त्यांचा केजरीवाल यांच्या घराशी कोणताही संबंध नाही.
प्रवेश वर्मा यांनी पुढे असा सवाल उपस्थित केला की, जो नेता स्वत:ला ‘सामान्य माणूस’ म्हणवतो, तो आज दिल्लीतील सर्वांत महागड्या भागात कसा राहू लागला? त्यांनी पक्षाच्या नावावरही टीका करत ‘आम आदमी पार्टी’चे नाव बदलून ‘आलिशान आदमी पार्टी’ करावे, अशी उपरोधिक टिप्पणी केली. तसेच, या नव्या घरासाठी किती खर्च झाला आणि तो पैसा कुठून आला, याचे उत्तर देण्याची मागणीही त्यांनी केली.
या वादात पंजाबचाही संदर्भ देण्यात आला. वर्मा यांच्या आरोपानुसार, दिल्लीतील राजकारणात अपयश आल्यानंतर केजरीवाल पंजाबमध्ये गेले आणि तेथेही सरकारी बंगल्यांवर त्यांचा आणि त्यांच्या सहका-यांचा ताबा असल्याचा दावा त्यांनी केला. त्यांनी असेही म्हटले की, पंजाबमध्येही अशाच प्रकारचा आलिशान प्रकल्प उभारण्यात आला आहे.
