परभणी : पोलिस मुख्यालयातील बँड पथकात जमादार म्हणून कार्यरत असलेल्या गंगाधर राणाप्रताप शिंदे यांचा परभणी ते जिंतूर मार्गावरील झरी ते कोक दरम्यानच्या माक पाटीजवळ मृतदेह आढळून आला.
ही घटना रविवार, दि.३ मे रोजी पहाटे उघडकीस आली. जमादार शिंदे हे दुचाकीवरून जिंतूर येथून परभणीकडे येत असताना अज्ञात वाहनाने त्यांना धडक दिली असल्याचा प्राथमिक अंदाज व्यक्त करण्यात येत असला तरी हा अपघात की घातपात याबद्दल शंका व्यक्त करण्यात येत आहे. दरम्यान ग्रामिणचे सपोनि. जीवन राजगुरू यांच्यापुढे या घटनेच्या तपासाचे मोठे आव्हान उभे राहीले आहे.
या घटनेबाबत मिळालेल्या माहितीनुसार जमादार शिंदे (वय ४० रा. त्रिमुर्तीनगर, परभणी) हे पोलिस मुख्यालयातील बँड पथकात बिगुल वाजविण्याचे काम करीत होते. रविवारी पहाटे २.३० ते ३ वाजण्याच्या सुमारास ते जिंतूर येथून परभणीकडे दुचाकी (क्र. एमएच २२ वाय ९८७८) वरून येत होते. या रस्त्यावरील माक पाटीजवळ त्यांच्या दुचाकीला अज्ञात वाहनाने धडक दिली असावी असा प्राथमिक अंदाज व्यक्त करण्यात येत आहे. सकाळी स्थानिक नागरिकांना शेतात त्यांचा मृतदेह आढळून आला. त्यानंतर याबाबत तात्काळ पोलिसांना माहिती देण्यात आली.
या घटनेची माहिती मिळताच ग्रामिण उपविभागीय पोलिस अधिकारी दिपककुमार वाघमारे, ग्रामिण पोलिस निरीक्षक जीवन राजगुरू, पोउपनि. कुंडलीक मोहिते, सपोउपनि. भरत तावरे, पोशि. नवनाथ लोणसे, बीट जमादार सुधीर डोंबे व अन्य अधिकारी उपस्थित होते. घटनास्थळी पंचनामा करून जमादार शिंदे यांचा मृतदेह परभणी जिल्हा सामान्य रूग्णालयात पाठविण्यात आला.
दरम्यान वृत्त लिहेपर्यंत गुन्हा नोंद झाला नव्हता. दरम्यान जमादार शिंदे यांचा मृत्यू संशयास्पद अपघाती मृत्यू झाल्याने अपघात नेमका कसा झाला याचा तपास पोलिस करीत आहेत. शिंदे यांच्या पश्चात पत्नी, दोन मुले असा परिवार आहे. त्यांच्या पार्थिवावर शासकीय इतमामात परभणी येथे सायंकाळी अंत्यसंस्कार करण्यात येणार असल्याची माहिती मिळाली आहे. या घटनेने पोलिस दलात खळबळ उडाली आहे.
