कॉलेज प्रशासनाकडून शिस्तभंगाची कारवाई?
पुणे : प्रतिनिधी
पुण्यातील ‘शिवाजीनगर येथील मॉडर्न महाविद्यालयात कनिष्ठ विभागात कार्यरत प्राध्यापक मनिषा मांढरे या २००२ पासून अध्यापन करीत होत्या. इयत्ता ११ वी आणि १२ वीच्या विद्यार्थ्यांना जीवशास्त्र विषय शिकवत होत्या. त्यांच्या अनुभवाच्या आधारे एनटीएमार्फत नीट परीक्षेसंदर्भातील काही गोपनीय कामकाजासाठी त्यांची नियुक्ती केली होती. मात्र, प्रश्नपत्रिका फुटी प्रकरणात त्यांचा सहभाग आढळला. त्यामुळे खासगी शाळांतील कर्मचारी (सेवेच्या अटी) नियमावली १९८१ (एमईपीएस) अंतर्गत मांढरे यांच्याविरोधात चौकशी प्रक्रिया राबवली जाणार असून, त्यानुसार पुढील शिस्तभंगाची कारवाई केली जाईल,’ अशी माहिती सोसायटीचे कार्यवाह प्रा. श्यामकांत देशमुख आणि प्राचार्य डॉ. निवेदिता एकबोटे यांनी दिली.
मनीषा मांढरे या ‘नीट यूजी’ परीक्षा प्रक्रियेत सहभागी होत्या. ‘नॅशनल टेस्टिंग एजन्सी’ने त्यांना तज्ज्ञ म्हणून नेमले होते. त्यांना वनस्पतीशास्त्र आणि प्राणिशास्त्र विषयांच्या प्रश्नपत्रिकांची माहिती होती. त्यांनी एप्रिल २०२६ मध्ये आरोपी वाघमारे हिच्या माध्यमातून ‘नीट’च्या संभाव्य उमेदवारांना गोळा करून त्यांच्या पुण्यातील घरात विशेष शिकवणी वर्ग घेतला. या वेळी प्रश्न विद्यार्थ्यांना वहीत लिहून घेण्यास सांगितले. त्यापैकी बहुतांश प्रश्न ३ मे रोजी झालेल्या ‘नीट-यूजी’ परीक्षेतील प्रत्यक्ष प्रश्नपत्रिकेशी जुळल्याचे तपासात निष्पन्न झाले. या प्रकरणी सीबीआयने शनिवारी नीट पेपरफुटी प्रकरणी प्रा. मनिषा मांढरेला अटक केली.
प्रा. मांढरेला १४ दिवसांची कोठडी
नवी दिल्ली : पेपर लीक प्रकरणात अटक करण्यात आलेल्या नवव्या आरोपीला सीबीआयने राऊस रेव्हेन्यू कोर्टात हजर केले. यावेळी बॉटनी शिक्षिका मनीषा मांढरेला १४ दिवसांची सीबीआय कोठडी सुनावली.
