मुंबई : प्रतिनिधी
दादरच्या शिवाजी पार्क येथील मीनाताई ठाकरे यांच्या पुतळ्यावर बुधवारी (१७ सप्टेंबर) सकाळी ६ नंतर रंग फेकून विटंबना करण्याचा प्रकार घडला आहे. याप्रकरणी उपेंद्र गुणाजी पावसकर याला पोलिसांनी अटक केली असून अधिक तपास करत आहेत. यानंतर आता फॉरेन्सिक टीमने देखील रंगाचे नमुने गोळा केले आहेत.
दादरच्या शिवाजी पार्क येथील मीनाताई ठाकरे यांच्या पुतळ्यावर बुधवारी सकाळी रंग फेकून विटंबना करण्याचा प्रकार घडला आहे. हे वृत्त वा-यासारखे पसरताच शिवसैनिक आणि मनसैनिकांनी शिवाजी पार्क परिसरात धाव घेऊन पुतळा तसेच परिसराची स्वच्छता केली. या घटनेमुळे दादरमध्ये तणाव निर्माण झाला होता. परंतु, कायदा आणि सुव्यवस्थेचा प्रश्न निर्माण होऊ नये यासाठी पोलिसांनी घटनास्थळी धाव घेऊन परिस्थितीवर ताबा मिळवला. यानंतर रात्री उपेंद्र गुणाजी पावसकर याला पोलिसांनी याप्रकरणी अटक केली आहे. तसेच अधिक तपास पोलिसांकडून करण्यात येत आहे. अशातच फॉरेन्सिक टीमने रंगाचे नमुने गोळा केले आहेत.
शिवाजी पार्क परिसरात नेहमीप्रमाणे नागरिक मॉर्निंग वॉक करीत असताना मीनाताई ठाकरे यांच्या पुतळ्यावर लाल रंग फेकल्याची घटना सकाळी समोर आली. या घटनेनंतर उद्धव ठाकरे गटाचे खासदार अनिल देसाई, आमदार महेश सावंत, माजी महापौर किशोरी पेडणेकर, महादेव देवळे, उपनेत्या विशाखा राऊत, विभागप्रमुख, शाखाप्रमुख तसेच कार्यकर्त्यांनी घटनास्थळी धाव घेतली. तसेच मनसे नेते बाळा नांदगावकर, अविनाश अभ्यंकर आदी नेतेमंडळी उपस्थित होते. परिस्थितीचे गांभीर्य लक्षात घेऊन शिवसैनिकांनी त्वरित पुतळ्याची साफसफाई केली.
दरम्यान, मीनाताई ठाकरे यांच्या पुतळ्याची विटंबना झाल्याचे समजताच मनसे अध्यक्ष राज ठाकरे यांनी देखील पुतळ्याच्या ठिकाणी धाव घेऊन पाहणी केली. तसेच घटनास्थळी पोहोचल्यावर ठाकरे गटाच्या नेत्यांशी चर्चा करून घटनेची माहिती घेतली.
