मुंबई : प्रतिनिधी
बनावट वैश्विक अपंग ओळखपत्र (यूडीआयडी) वापरून राज्य परिवहन महामंडळाच्या (एसटी) प्रवास सवलतीचा लाभ घेणा-या प्रवाशांवर कठोर कारवाई करण्यात येणार आहे. अशा प्रकरणांमध्ये थेट गुन्हा दाखल करून बनावट ओळखपत्र जप्त करण्याचे निर्देश दिव्यांग कल्याण विभागाचे सचिव तुकाराम मुंढे यांनी राज्य परिवहन महामंडळाचे व्यवस्थापकीय संचालक डॉ. माधव कुसेकर यांना पत्र पाठवून दिले आहेत.
बनावट यूडीआयडीच्या आधारे एसटीच्या सवलती घेतल्याचे आढळल्यास, संबंधित व्यक्तीविरोधात दिव्यांग व्यक्ती हक्क अधिनियम, २०१६ अंतर्गत गुन्हा दाखल करण्याच्या सूचना देण्यात आल्या आहेत. तसेच बनावट ओळखपत्र तत्काळ जप्त करून त्याची माहिती दिव्यांग कल्याण विभागाला कळवण्याचेही आदेश देण्यात आले आहेत.
सोलापूरमध्ये उघडकीस आलेल्या बनावट अपंग ओळखपत्र प्रकरणानंतर राज्यभर ही कारवाई राबवली जाणार आहे. पात्र दिव्यांग व्यक्तींनाच सवलतींचा लाभ मिळावा आणि गैरवापर थांबवावा यासाठी यूडीआयडीची तांत्रिक पडताळणी करून कठोर अंमलबजावणी करण्याचा निर्णय घेण्यात आला आहे.
एसटीतील सर्व वाहक, पर्यवेक्षक आणि तपासणी कर्मचा-यांना त्यांच्या मोबाईलमध्ये यूडीआयडी अॅप डाऊनलोड करून कर्तव्यावर असताना प्रत्येक दिव्यांग प्रवाशाची पडताळणी करण्याचे आदेश देण्यात आले आहेत. एकंदरीत, बनावट यूडीआयडीद्वारे सवलती लाटणा-यांवर कडक कारवाई करून पात्र दिव्यांग व्यक्तींचे हक्क सुरक्षित ठेवण्याचा सरकारचा हा निर्णय असल्याचे स्पष्ट होत आहे.
प्रवाशांच्या ओळखपत्रांची तपासणी
या पार्श्वभूमीवर एसटी महामंडळाने यूडीआयडीची पडताळणी करण्यासाठी तांत्रिक यंत्रणा वापरण्याचे ठरवले आहे. वाहक, तिकिट तपासनीस आणि मार्ग तपासणी कर्मचारी यांनी यूडीआयडी विभागाचे अधिकृत मोबाईल अॅप वापरून प्रवाशांच्या ओळखपत्रांची तपासणी करावी, असे निर्देश देण्यात आले आहेत. या अॅपमध्ये प्रवाशाचा यूडीआयडी क्रमांक आणि जन्मतारीख नोंदवून ओळखपत्राची वैधता तपासली जाणार आहे.
नियमानुसार सवलतीचा लाभ
तपासणीत यूडीआयडी वैध आढळल्यास संबंधित प्रवाशाला नियमानुसार सवलतीचा लाभ दिला जाईल. मात्र ओळखपत्र बनावट असल्याचे सिद्ध झाल्यास, संबंधिताविरुद्ध गुन्हा दाखल करून ओळखपत्र जप्त करण्यात येईल आणि ते आगारात जमा करण्याची प्रक्रिया राबवली जाईल. या निर्णयानुसार, एसटी महामंडळाच्या वाहतूक खात्याच्या महाव्यवस्थापकांनी सर्व प्रादेशिक व्यवस्थापक आणि विभाग नियंत्रकांना आवश्यक सूचना दिल्या आहेत.
