छ. संभाजीनगर : प्रतिनिधी
मराठा आंदोलक मनोज जरांगे पाटील यांना अखेर रूग्णालयातून डिस्चार्ज मिळाला आहे. जवळपास २० दिवसांच्या उपोषणानंतर त्यांना छत्रपती संभाजी नगर येथील गॅलेक्सी रूग्णालयात दाखल करण्यात आले होते. त्यांच्यावर रूग्णालयात अनेक दिवस उपचार सुरू होते. आता मात्र त्यांना रूग्णालयातून डिस्चार मिळाला आहे.
डिस्चार्ज मिळाल्यानंतर आता मनोज जरांगे पाटील हे अंतरवाली सराटी येथे जाणार नसून ते जालना जिल्ह्यातील महाकाळा अंकुशनगर येथील त्यांच्या घरी जाणार आहेत.
मराठा आरक्षणासंदर्भातील कुणबी नोंदी अन दिलेले दाखले रद्द करण्यावरून मनोज जरांगे पाटील यांनी अंतरवाली सराटीमध्ये उपोषण केले होते. राज्य सरकार आपल्या मागण्या मान्य करत नाही हे पाहिल्यानंतर त्यांनी मुंबईकडे कूच केली होती. मात्र पाटोदा इथंपर्यंत पोहचल्यानंतर त्यांची प्रकृती जास्तच खालावली.
मात्र सरकारने देखील सकारात्मकता दाखवत पाटोदा येथे राज्य सरकारचे शिष्टमंडळ पाठवून चर्चा केली. त्यानंतर मनोज जरांगे पाटील यांनी मागण्यांबाबत सकारात्मक तोडगा काढण्यासाठी सरकारला अजून थोडा वेळ देत आपली चलो मुंबई मोहीम तुर्तास स्थगित केली होती.
यानंतर मनोज जरांगे पाटील यांना छत्रपती संभाजी नगर येथील रूग्णालयात हलवण्यात आले. तिथे त्यांच्यावर उपचार सुरू करण्यात आले होते. उपचार सुरू असातना देखील मनोज जरांगे पाटील हे माध्यमांशी बोलत होते. त्यावेळी त्यांनी आता पुढचे आंदोलन अंतरवाली सराटीत होईल असे नाही. दे राज्यात कुठेही होऊ शकते असे सांगितले होते.
आता पुढचे आंदोलन हे पाटोदापासून पुढे कुठेही होईल. ते मुंबईत होईल परळीत होईल किंवा येवल्यात देखील होईल असे सांगत मनोज जरांगे पाटील यांनी आंदोलनाचे ठिकाण गुलदस्त्यात ठेवले.
सरसकट नुकासन भरपाई द्या
मनोज जरांगे पाटील यांनी यंदाच्या दसरा मेळाव्याबाबत देखील माहिती दिली. ते म्हणाले की यंदाचा दसरा मेळावा हा नारायण गडावर होणार आहे. काल बैठक झाली असून २० ऑक्टोबर रोजी दासरा मेळावा होणार आहे. या मेळाव्याला सर्वांनी यावे अशी देखील विनंती पाटील यांनी केली.
