मुंबई : प्रतिनिधी
जुलै महिन्यात पहिल्याच आठवड्यात मराठी आणि हिंदी चित्रपटांमध्ये तगडी टक्कर पाहायला मिळणार आहे. एकाच दिवशी म्हणजे ३ जुलै २०२६ ला (शुक्रवारी) २ मराठी आणि २ हिंदी चित्रपट रिलीज होत आहेत. कोणत्या चित्रपटाला अधिक गर्दी जमणार हे पाहणे महत्त्वाचे ठरणार आहे.
अल्फा : आलिया भट्ट आणि शर्वरी वाघचा अल्फा चित्रपट अॅक्शन, स्पाय, थ्रिलर आहे. ‘अल्फा’ हा यशराज फिल्म्सचा चित्रपट आहे. ‘अल्फा’ चित्रपटात आलिया भट्ट आणि शर्वरी वाघ अॅक्शन मोडमध्ये पाहायला मिळणार आहेत. ‘अल्फा’ हा भारतातील पहिला महिलाप्रधान अॅक्शन चित्रपट आहे. चित्रपटात हृतिक रोशन एका दमदार कॅमिओमध्ये दिसणार आहे.
बेबी डू डाय डू
‘बेबी डू डाय डू’ हा क्राईम, अॅक्शन चित्रपट आहे. हा चित्रपट बेबी कर्मारकर नावाच्या एका सामान्य कर्णबधिर-मूक एनजीओ कार्यकर्तीची कथा आहे. जी गुप्तपणे मुंबईत एक निर्दयी सुपारी किलर म्हणून काम करते. चित्रपटात हुमा कुरैशी मुख्य भूमिकेत झळकली आहे.
‘मर्दिनी’: हा चित्रपट एका आईवर आहे, जी आपल्या मुलीसाठी कोणतेही धाडस करू शकते. ‘ज्याला आई तारी, त्याला कोण मारी’ ही टॅगलाईन खूप प्रसिद्ध झाली. या चित्रपटात आईच्या भूमिकेत मराठी अभिनेत्री प्रार्थना बेहेरे आणि मुलीच्या भूमिकेत बाल कलाकार मायरा वायकुळ झळकणार आहे.
आऊट ऑफ सिलॅबस : ‘आऊट ऑफ सिलॅबस : पुस्तकांच्या पलीकडे’ हा चित्रपट एमपीएससी (महाराष्ट्र लोकसेवा आयोग) परीक्षेची तयारी करणा-या तरुणांच्या संघर्षावर आधारित आहे. चित्रपटात अभिनेता अजिंक्य राऊत, अभिनेत्री अद्वयी मुख्य भूमिकेत झळकणार आहेत.
नागबंधम : द सीक्रेट ट्रेजर
‘नागबंधम : द सीक्रेट ट्रेजर’ हा साऊथ चित्रपट आहे. हा चित्रपट तेलुगू आणि हिंदीत डब होणार आहे. हा पौराणिक कथा आणि इतिहासावर आधारित एक भव्य अॅक्शन-अॅडव्हेंचर चित्रपट आहे. ही कथा एका योद्ध्याभोवती फिरते.
