लातूर : प्रतिनिधी
महाराष्ट्राच्या पूर्वापार चालत आलेल्या लोककला या संतांच्या संगतीत जगल्या, असे नमुद करुन लोककला अभ्यासक, मुंबई विद्यापीठाच्या लोककला अकादमीचे प्रमुख डॉ. गणेश चंदनशिवे यांनी भारुड, ओव्या, गोंधळ, पोवाडा, शेतकरी गीत अशा विविध कलाप्रकारांची इत्यंभूत माहिती व महती उपस्थित प्रशिक्षणार्थीना सांगितली.
बालरंगभूमी परिषद लातूर शाखा व राजर्षी शाहू महाविद्यालयाच्या संयुक्त विद्यमाने लोककला प्रशिक्षण कार्यशाळेचे आयोजन करण्यात आले होते. राजर्षी शाहू महाविद्यालयात पार पडलेल्या कार्यशाळेचे उद्घाटन लोककला अभ्यासक, मुंबई विद्यापीठाच्या लोककला अकादमीचे प्रमुख डॉ. गणेश चंदनशिवे यांच्या हस्ते झाले त्याप्रसंगी ते बोलत होते. अध्यक्षस्थानी प्राचार्य डॉ. महादेव गव्हाणे, तर प्रमुख अतिथी म्हणून अॅड. शैलेश गोजमगुंडे, प्रा. दीपक वेदपाठक, प्रा. ओमप्रकाश झुरळे आदी उपस्थित होते. दिवसभर चाललेल्या या कार्यशाळेत डॉ. चंदनशिवे यांनी लोककला, लोकसंगीत, लोकनृत्य व लोकवाद्याविषयी प्रात्यक्षिकासह सखोल मार्गदर्शन केले.
अध्यक्षीय समारोपात डॉ. गव्हाणे यांनी लातूरच्या कलासंस्कृतीचा आढावा घेत नव्या पिढीला लोककला आकलन होण्याची आवश्यकता असल्याचे प्रतिपादन केले. अॅड. शैलेश गोजमगुंडे म्हणाले, लातूर सर्व स्तरातील सांस्कृतिक भूक असलेलं शहर आहे. नव्या पिढीवर कलासंस्कार करण्यास बालरंगभूमी परिषद व आम्ही सदैव सक्रिय आहोत. ५७८ बाल कलाकारांनी सहभाग घेतलेली ही कार्यशाळा हलगी, संबळ, ढोलकी, दिमडी, टाळाच्या तालात अगदी जल्लोषात झाली. उद्घाटन सत्राचे प्रास्ताविक बालरंगभूमी परिषदेचे प्रमुख कार्यवाह प्रा. नवलाजी जाधव यांनी केले, आभार लातूर शाखा अध्यक्ष रणजित आचार्य यांनी मानले तर सूत्रसंचालन प्रा. सूर्यकांत चव्हाण यांनी केले.
या कार्यशाळेच्या यशस्वीतेसाठी प्रा. वैभव माने, लोककला महोत्सव समितीचे प्रमुख मयूर राजापूरे, हिरा वेदपाठक, रवी अघाव, रवीकिरण सावंत, विशाल वाटवडे, सुमती बिडवे-सोमवंशी, महेश पवार, महेश बिडवे, प्रिती ठाकूर, तेजश्री घवले, सलीम शेख, वसुधा पाटील, तन्मय रोडगे, प्रा. हरी कुंभार, आनंत खलुले, ओम भंडारे, शरीफ पठाण, ऋतुराज सुरवसे, पृथ्वीराज चव्हाण, यश कांबळे, आदित्य पवार, कृष्णा शिंदे, अश्वराज ढोरमारे, राम रेड्डी, आकाश बाभळे, महेक अन्सारी, मयुरी वाघमारे, नैतिक बिराजदार, आर्यन गिरलकर, बालाजी डोनेराव आदींनी परिश्रम घेतले.
