मुंबईतील चितळे डॉक्टरांसह इतरांचा संपर्क होईना
मुंबई : प्रतिनिधी
कैलास मानसरोवर यात्रेसाठी गेलेले मुंबईचे डॉक्टर मिलिंद चितळे आणि त्यांचा मुंबईतील ६० जणांचा ग्रूप नेपाळ आणि चीन बॉर्डरवरच्या इमिग्रेशन बिल्डिंगच्या ढिगा-याखाली अडकल्याची माहिती रिचा ट्रॅव्हल्सने दिली. आता या पर्यटकांचा चिखल, मातीच्या ढिगा-याखाली फसून मृत्यू झाल्याची शंका नेपाळ सरकारला आहे. हे पर्यटक ४० ते ५० फूट खाली दबले गेले असावेत, असा अंदाज आहे. त्यामुळे या पर्यटकांच्या कुटुंबीयांवर दु:खाचा डोंगर कोसळला आहे.
मुंबईतल्या अंधेरी परिसरातून डॉक्टर मिलिंद चितळे यांची टूर कंपनी ही लँड ट्रेल्सच्या माध्यमातून दि. २२ ऑगस्टला अंधेरी, विलेपार्ले, ठाणे, कोल्हापूर, पुणे, नागपूर परिसरातून ६० पर्यटक कैलास मानसरोवरला गेले होते. २३ तारखेला तिथे पोहोचल्यावर २ दिवस त्यांना बेसिक ट्रेकिंगसाठी ठेवले होते. २५ तारखेला रात्री ते बॉर्डरजवळ पोहोचले आणि २६ तारखेला सकाळी हे सर्व पर्यटक नेपाळ आणि चीन बॉर्डरवरील इमिग्रेशन बिल्डिंगमधून कैलास मानसरोवरसाठी चीनमध्ये प्रवेश करणार होते. त्याचदरम्यान, महाप्रलय आला आणि इमिग्रेशन इमारतीत मातीच्या ढिगा-याखाली हा ग्रुप दबला गेला. त्यामुळे त्यांचा ठावठिकाणा लागणे कठीण आहे.
नेपाळ सरकारनेही या पर्यटकांच्या कुटुंबीयांना माहिती दिली असून, बचाव पथक सध्या घटनास्थळी पोहोचू शकत नाही. नेपाळ-चीन सीमेजवळ रस्त्यावर मोठ्या प्रमाणात चिखल, माती आणि दगडांचा खच आहे. सध्या इमारतीवरील मातीचा ढिगारा हलविता येत नाही. पर्यटक याच ढिगा-याखाली दबले गेल्याची भीती नेपाळ सरकारने व्यक्त केली. नेपाळ आर्मीसोबत नेपाळ पोलिस आणि वेगवेगळ््या यंत्रणा या पर्यटकांचा शोध घेत आहेत.
६ महिने प्रतीक्षा
करण्यास सांगितले!
नेपाळ सरकारने या पर्यटकांच्या कुटुंबियांना १८४ दिवस म्हणजेच सहा महिने थांबण्याची सूचना केली. त्याअगोदर भारतामध्ये लोकल पोलिस स्टेशनमध्ये पर्यटक हरवल्याच्या तक्रारी नोंदवायच्या सूचना नेपाळ सरकारने भारतीय दुतावासाला केल्या. त्यामुळे चिंता वाढली आहे.
