मुंबई : प्रतिनिधी
गेल्या काही दिवसांपासून उघडीप दिलेल्या पावसानं मुंबईत आज जोरदार बॅटिंग केलीय. हवामान विभागाने या आठवड्यात मुंबईत वादळी वा-यासह मुसळधार पावसाचा इशारा दिलाय. यंदा जुलै महिन्यात मुंबईत खूपच कमी पाऊस पडला आहे. मुंबईत रात्रभर मुसळधार पाऊस कोसळत असून, काही सखल भागात पाणी साचले आहे.
जुलै महिन्याच्या सुरुवातीला पाऊस कमी प्रमाणात पडला आणि गेल्या काही दिवसांपासून उघडीप दिलेल्या पाऊस रात्रभर कोसळत राहिला. मुंबईत पावसाचा जोर काहीसा कमी झालेला असला तरी पूर्व आणि पूर्व उपनगरांतील बहुतेक भागात मुसळधार पाऊस सुरूच आहे. रात्रभर झालेल्या मुसळधार पावसामुळे शहर आणि उपनगरातील अनेक सखल भागात पाणी साचले.
लोकल गाड्यांना उशीर
पाणी साचल्यामुळे अंधेरी सबवे वाहतुकीसाठी बंद करण्यात आलाय. सकाळच्या गर्दीच्या वेळी पाऊस आणि इतर कारणांमुळे पूर्व द्रुतगती महामार्ग आणि पश्चिम द्रुतगती महामार्गावर वाहतूक मंदावली होती. काही प्रवाशांनी लोकल गाड्या थोड्या उशिराने धावत असल्याच्याही तक्रारी केल्यात. सोमवारी सकाळी ८ वाजता २४ तासांच्या कालावधीत मुंबईत सरासरी २३.४५ मिमी, पूर्व उपनगरात ३६.४२ मिमी आणि पश्चिम उपनगरात ५०.०२ मिमी पाऊस पडला, असे महापालिकेच्या अधिका-यांनी सांगितले.
