छत्रपती संभाजीनगर : प्रतिनिधी
हैदराबाद मुक्तिसंग्राम दिनाचा सोहळा आज छत्रपती संभाजीनगर येथे पार पडत आहे. मुख्य शासकीय सोहळा मुख्यमंत्री देवेंद्र फडणवीस यांच्या प्रमुख उपस्थितीत सिद्धार्थ उद्यानात सुरू होता. मात्र मुख्यमंत्री फडणवीस हे भाषणासाठी उभे राहिल्यानंतर ओबीसी आंदोलकांनी सभास्थळी गोंधळ घातल्याचे पाहायला मिळाले. सरकारने मराठा आरक्षणासाठी काढलेल्या जीआरमुळे ओबीसी समाजावर अन्याय होत असल्याचे सांगत या आंदोलकांनी जोरदार घोषणाबाजी केली.
हैदराबाद मुक्तिसंग्राम दिनानिमित्त मुख्यमंत्री देवेंद्र फडणवीस यांचे भाषण सुरू होताच या कार्यक्रमात उपस्थित असलेले काही ओबीसी आंदोलक अचानक उठले आणि त्यांनी घोषणाबाजी करण्यास सुरुवात केली. त्यामुळे सभास्थळी गोंधळ उडाला होता. त्यानंतर पोलिस कर्मचा-यांनी घोषणाबाजी करणा-या ओबीसी आंदोलकांना बाजूला नेत ताब्यात घेतले आहे.
दरम्यान, मुक्तिसंग्राम दिनानिमित्ताने छत्रपती संभाजीनगरमध्ये विविध संस्था, संघटनांतर्फे विविध कार्यक्रमांचे आयोजन करण्यात आले आहे.
मराठा आणि ओबीसी आरक्षणावरून गोंधळ सुरू असताना ओबीसी मंत्रिमंडळ उपसमितीची बैठक बावनकुळे यांच्या अध्यक्षतेखाली काल अन्न व नागरी पुरवठा मंत्री छगन भुजबळ यांच्या मंत्रालयातील दालनात पार पडली. या बैठकीला पशुसंवर्धन मंत्री पंकजा मुंडे, इतर मागास व बहुजन कल्याणमंत्री अतुल सावे, वनमंत्री गणेश नाईक आणि कृषिमंत्री दत्तात्रय भरणे उपस्थित होते. या वेळी सविस्तर चर्चा झाली.
दरम्यान, बोगस जात प्रमाणपत्रांना आळा घालण्यासाठी कागदपत्रांची सखोल पडताळणी करण्याचे निर्देश मंत्रिमंडळ उपसमितीचे अध्यक्ष चंद्रशेखर बावनकुळे यांनी यावेळी दिले आहेत. ओबीसी समाजासाठी प्रलंबित असलेला २,९३३ कोटी रुपयांचा निधी १५ दिवसांत वितरित करण्याचे आदेशही त्यांनी दिले.
