पिंपरी-चिंचवड : येथील मोशी कचरा डेपोमध्ये झालेल्या दुर्घटनेतील मृतांची संख्या ९ पोहोचली आहे. मदत आणि बचाव कार्याच्या चौथ्या दिवशी शनिवारी (११ जुलै) ढिगा-याखालून ८ जणांचे मृतदेह बाहेर काढण्यात आले. यानंतर रात्री उशिरा आणखी एका व्यक्तीचा मृतदेह आढळून आला.
त्यामुळे या दुर्घटनेतील मिळालेल्या माहितीनुसार, शनिवारी मध्यरारात्री सुमारे १ वाजण्याच्या सुमारास शोधपथकाला आणखी एक व्यक्ती आढळून आली. ती व्यक्ती वामन कसबे असल्याचे निष्पन्न झाले. त्यांना तातडीने पिंपरी येथील यशवंतराव चव्हाण (वायसीएम) रुग्णालयात दाखल करण्यात आले. मात्र, डॉक्टरांनी तपासणीनंतर त्यांना मृत घोषित केले.
दरम्यान, ही घटना ८ जुलै रोजी दुपारी दीडच्या सुमारास घडली होती. मोशी कचरा डेपोमधील ‘वेस्ट-टू-एनर्जी’ (कच-यापासून ऊर्जा निर्मिती) प्रकल्पाच्या प्रशासकीय इमारतीवर कच-याचा एक प्रचंड ढिगारा कोसळला होता. त्यावेळी इमारतीमध्ये २२ कर्मचारी कार्यरत होते, तर इमारतीलगत कच-याच्या ढिगाजवळ एक व्यक्ती उपस्थित होती. अशा स्थितीत एकूण २३ जण ढिगा-याखाली अडकले होते. घटनेनंतर राष्ट्रीय आपत्ती प्रतिसाद दल , अग्निशमन दल आणि स्थानिक प्रशासनाच्या पथकांकडून युद्धपातळीवर बचाव आणि शोधमोहीम राबविण्यात आली.
दुर्घटनेनंतर ५ जणांना स्वत:हून बाहेर पडण्यात यश आलं होतं. त्यानंतर भारतीय सेना, एनडीआरएफ, पिंपरी-चिंचवड महापालिका, पीएमआरडीए अग्निशमन दल, राज्य आपत्ती प्रतिसाद पथक आणि पोलीस प्रशासनाने युद्धपातळीवर बचाव आणि शोधमोहीम सुरू केली. पहिल्याच दिवशी ढिगा-याखालून ९ जणांची सुखरूप सुटका करण्यात आली.
