मुंबई : महाराष्ट्रात गेल्या दीड महिन्यापासून पावसाने दडी मारल्यामुळे शेतकरी प्रचंड अडचणीत सापडला आहे. राज्यातील अनेक भागांत खरीप पिकांची अवस्था अत्यंत बिकट झाली आहे. पावसाअभावी सोयाबीन, कापूस वाळले असून उसाचेही मोठे नुकसान झाले आहे. या गंभीर परिस्थितीची दखल घेत प्रशासनाने राज्यात दुष्काळाचा ‘ट्रिगर-१’ लागू केला आहे. तसेच विरोधकांकडून दुष्काळ जाहीर करण्याची मागणी होत असतानाच सरकारने याबाबत महत्त्वाची माहिती दिली आहे.
परिस्थितीचे गांभीर्य ओळखून मुख्यमंत्री देवेंद्र फडणवीस यांनी सर्व जिल्ह्यांच्या पालकमंत्र्यांना दुष्काळग्रस्त भागांत प्रत्यक्ष जाऊन परिस्थितीचा आढावा घेण्याचे निर्देश दिले आहेत. तीव्र टंचाईचा सामना करण्यासाठी महसूल, कृषी आणि जलसंपदा विभागाच्या माध्यमातून तातडीने उपाययोजना राबवण्याची चाचपणी राज्य सरकारकडून सुरू करण्यात आली आहे.
दुसरीकडे, राष्ट्रवादी काँग्रेसचे सर्वेसर्वा शरद पवार यांनीही दुष्काळाच्या मुद्द्यावर आक्रमक भूमिका घेतली आहे. शरद पवार २८ सप्टेंबर रोजी दुष्काळी भागाचा दौरा करणार आहेत. काही दिवसांपूर्वीच शरद पवार यांनी मुख्यमंत्री देवेंद्र फडणवीस यांना पत्र लिहून राज्यात कोरडा दुष्काळ जाहीर करण्याची मागणी केली होती.
दुष्काळ १०० टक्के जाहीर होणार : सहकारमंत्री बाबासाहेब पाटील
राज्य सरकारमधील सहकारमंत्री बाबासाहेब पाटील यांनी परिस्थितीबाबत बोलताना सांगितले, एवढा दुष्काळ मी माझ्या आयुष्यात कधी बघितलेला नाही. कुठलीच पीके आलेली नाहीत. सोयाबीन, कापूस गेला उसाचे नुकसान झालं. दुष्काळ तर जाहीर होणारच आहे. एनडीआरएफच्या नियमांप्रमाणे शासन मदत करणारच आहे. दुष्काळ १०० टक्के जाहीर होणार आहे.
