गांधीनगर : पंतप्रधान नरेंद्र मोदी यांनी गुजरातमधील गांधी नगर येथे १० व्या व्हायब्रंट गुजरात ग्लोबल समिट चे उद्घाटन केले. यावेळी या समिटची थीम ‘गेटवे टू द फ्युचर’ आहे. यामध्ये राज्यातील भविष्यातील गुंतवणूक आणि भविष्यातील प्रकल्पांची माहिती दिली जाणार आहे.
व्हायब्रंट गुजरात ग्लोबल समिटमध्ये देशातील मोठे उद्योगपती सहभागी होणार आहेत. ज्यामध्ये अदानी ग्रुपचे गौतम अदानी, रिलायन्स इंडस्ट्रीजचे मुकेश अंबानी, आदित्य बिर्ला ग्रुपचे कुमार मंगलम बिर्ला, सुझुकी मोटर कॉर्पचे तोशिहिरो सुझुकी, वेदांत ग्रुपचे अनिल अग्रवाल, आर्सेलर मित्तलच्या लक्ष्मी मित्तल, उदय कोटक यांसारख्या मोठ्या उद्योगपतींचा समावेश आहे.
यावेळी रिलायन्स इंडस्ट्रीज लिमिटेडचे अध्यक्ष मुकेश अंबानी म्हणाले की, ‘मोदी है तो मुमकिन है’. गुजरात हे आधुनिक भारताच्या विकासाचे प्रवेशद्वार आहे. गुजरात हे माझे कामाचे ठिकाण आणि माझ्यासाठी मातृभूमी आहे.
AI गुजरातची क्षमता वाढवेल
अंबानी म्हणाले की, रिलायन्स नेहमीच गुजराती कंपनी राहील. गुजरात हा हरित उत्पादनांचा मोठा निर्यातदार देश असेल. आर्टिफिशियल इंटेलिजन्स (AI) क्रांतीच्या माध्यमातून गुजरातची क्षमता वाढणार आहे. एआय गुजरातच्या प्रत्येक क्षेत्राची क्षमता वाढवेल.
रिलायन्स रिटेलचा फायदा शेतकरी, व्यावसायिकांना
मुकेश अंबानी म्हणाले की, मला गुजराती असल्याचा अभिमान आहे. भारताचे पंतप्रधान नरेंद्र मोदी बोलतात तेव्हा जग ऐकते. रिलायन्स ही गुजराती कंपनी होती आणि भविष्यातही गुजराती कंपनी राहील. रिलायन्स रिटेलचा फायदा शेतकरी आणि छोट्या व्यावसायिकांना झाला आहे.
