निलंगा : प्रतिनिधी
पावसाने पाठ फिरवल्याने शिवार करपले, सोयाबीन हातातून गेले आणि शेतक-यांच्या डोळ्यांत अश्रू आले. निलंगा तालुक्यातील जाऊ येथे बुधवारी नुकसानग्रस्त शेतीची पाहणी करताना मुख्यमंत्री देवेंद्र फडणवीस यांनी शेतक-यांच्या व्यथा प्रत्यक्ष ऐकून घेतल्या. यावेळी त्यांनी ‘शेतक-यांना वा-यावर सोडणार नाही; शासन सरसकट मदत करणार आहे, अशी ग्वाही दिली.
दीर्घकाळ पावसाचा खंड पडल्याने सोयाबीनसह खरीप पिकांची झालेली दुरवस्था शेतक-यांनी मुख्यमंत्र्यांच्या निदर्शनास आणून दिली. मुख्यमंत्री स्वत: शेतात उतरले आणि हातात वाळलेली सोयाबीनची पिके घेऊन नुकसानीची पाहणी केली. पिकांची अवस्था पाहून शेतक-यांसमोरील आर्थिक संकटाची तीव्रता त्यांनी जाणून घेतली. जाऊ येथील शेतकरी नूर पटेल पिकांच्या नुकसानीची माहिती देताना भावूक झाले. महिला शेतकरी मंगलबाई कोयते यांनाही आपली व्यथा सांगताना अश्रू अनावर झाले. शेतक-यांच्या या व्यथा ऐकून मुख्यमंत्री फडणवीस यांनी त्यांना धीर देत चिंता करू नका, सरकार आपल्या पाठीशी ठामपणे उभे आहे, असा विश्वास दिला.पावसाच्या प्रदीर्घ खंडामुळे खरीप हंगाम हातातून निसटला असून नुकसानग्रस्त शेतक-यांना तातडीने मदत मिळावी, यासाठी शासन आवश्यक कार्यवाही करणार असल्याचे मुख्यमंत्र्यांनी यावेळी सांगितले.
यावेळी पालकमंत्री शिवेंद्रसिंहराजे भोसले, सहकारमंत्री बाबासाहेब पाटील, खा. ओमराजे निंबाळकर, माजीमंत्री आ. संभाजीराव पाटील निलंगेकर, आमदार अभिमन्यू पवार, माजी मंत्री आ. संजय बनसोडे, आमदार बसवराज पाटील, युवा नेते अरविंद पाटील निलंगेकर, पोलिस अधीक्षक सोमय मुंडे, उपविभागीय अधिकारी शरद झाडके, तहसीलदार प्रसाद कुलकर्णी, जिल्हा परिषद अध्यक्षा उषा पाटील यांच्यासह पदाधिकारी, अधिकारी आणि शेतकरी उपस्थित होते.
