जळकोट : प्रतिनिधी
आषाढी एकादशीनिमित्त जळकोट तालुक्यातील प्रसिद्ध धार्मिक स्थळांवर भक्तांचा मोठा जनसागर उसळला. प्रति पंढरपूर म्हणून ओळखल्या जाणा-या वांजरवाडा येथील श्री संत गोविंद माऊली मंदिरात हजारो भाविकांनी दर्शनासाठी हजेरी लावली. पहाटेपासूनच मंदिर परिसरात भाविकांची मोठी गर्दी झाली होती. मंदिरापासून सुमारे अर्धा किलोमीटरपर्यंत दर्शनाची रांग लागली होती. दर्शनासाठी दोन ते तीन तास प्रतीक्षा करावी लागत असल्याचे चित्र दिवसभर पाहायला मिळाले.
आषाढी एकादशीच्या निमित्ताने मंदिरात विविध धार्मिक कार्यक्रम, भजन-कीर्तन व नामस्मरणाचे आयोजन करण्यात आले होते. दापका येथील संत नामदेव महाराज दापकेकर यांच्या दिंडीचेही वांजरवाडा येथे उत्साहात स्वागत करण्यात आले. जळकोट, कंधार, मुखेड,अहमदपूर तसेच परिसरातील विविध गावांतील हजारो वारकरी व भाविकांनी श्री संत गोविंद माऊलींचे दर्शन घेऊन आशीर्वाद घेतला. मंदिर देवस्थान समिती व ग्रामस्थांच्या वतीने भाविकांसाठी चहा व फराळाची व्यवस्था करण्यात आली होती. दर्शनासाठी आलेल्या भाविकांना कोणतीही गैरसोय होऊ नये यासाठी स्वयंसेवक तैनात करण्यात आले होते. तसेच कायदा व सुव्यवस्था अबाधित राहावी यासाठी पोलिस बंदोबस्तही ठेवण्यात आला होता.
जळकोट तालुक्यातील विराळ येथील प्रसिद्ध श्री धोंडूतात्या देवस्थानात येथेही हजारो भाविकांनी दर्शनासाठी गर्दी केली. करंजी, कुणकी, जळकोट, कोळनूर, माळहिप्परगा, लाळी, सोनवळा तसेच तालुक्यातील अनेक गावांतील भक्तांनी मंदिरात दर्शन घेऊन धार्मिक कार्यक्रमांमध्ये सहभाग नोंदविला. देवस्थान समितीच्या वतीने उपवास करणा-या भाविकांसाठी फराळाची व्यवस्था करण्यात आली होती. दिवसभर भक्तीमय वातावरणात भजन, नामस्मरण व धार्मिक कार्यक्रम पार पडले. आषाढी एकादशीच्या पावन पर्वामुळे वांजरवाडा आणि विराळ या दोन्ही देवस्थानांमध्ये भक्ती, श्रद्धा आणि उत्साहाचे वातावरण अनुभवायला मिळाले.
