पुणे : प्रतिनिधी
पुण्यात पुन्हा एकदा संतापजनक घटना घडली आहे. पुण्यातील भोर तालुक्यातील एका गावात पुन्हा भयंकर प्रकार घडला आहे. बाहेर कामासाठी आलेल्या कुटुंबातील ३० वर्षीय सावत्र बापाने दहा वर्षांच्या मुलीवर अत्याचार केल्याची घटना घडली आहे. भोर तालुक्यात पुन्हा संतापजनक प्रकार घडल्याने नागरिकांकडून संताप व्यक्त केला जात आहे. या प्रकरणी पीडित मुलीच्या आईने दिलेल्या तक्रारीवरून भोरच्या राजगड पोलिसांत आरोपीवर पोक्सो कायद्यांतर्गत गुन्हा दाखल केला आहे. त्यानंतर पोलिसांनी आरोपीला अटक केली आहे.
मिळालेल्या माहितीनुसार, भोर तालुक्यातील एका गावात संबंधित कुटुंब बाहेरील जिल्ह्यातून कामासाठी आले होते. आरोपीने मुलीवर अत्याचार केला आहे. नराधमाच्या अत्याचारानंतर मुलीला शारीरिक त्रास होऊ लागला. त्यानंतर तिने हा प्रकार आईला सांगितला. आईने स्थानिक नागरिक आणि मुकादमाच्या मदतीने राजगड पोलिस ठाण्यात धाव घेतली.
पोलिसांत गुन्हा दाखल होताच पोलिसांनी कारवाईला सुरुवात केली. पोलिस निरीक्षक संतोष जाधव यांनी घटनेचे गांभीर्य ओळखून तातडीने पथक पाठवून आरोपीला ताब्यात घेतले. आरोपीने गुन्ह्याची कबुली दिली आहे. त्यानंतर पीडित मुलीला उपचारासाठी रुग्णालयात दाखल करण्यात आले आहे. पोलिस उपनिरीक्षक अजित पाटील या प्रकरणाचा पुढील तपास करत आहेत. या प्रकरणी आरोपीवर कठोर कारवाईची मागणी केली जात आहे.
