अनुसूचित जाती जमातीतील घरांना वीज देण्याचा मानस : मुख्यमंत्री
नागपूर : प्रतिनिधी
‘प्रत्येक गरजू अनुसूचित जाती-जमातीच्या घराला सोलरची सुविधा उपलब्ध करून देत त्यांना मोफत विजेचा लाभ मिळवून देण्याचा राज्य सरकारचा मानस आहे. अनुसूचित जाती-जमातीसह हळूहळू ओबीसी तसेच प्रधानमंत्री आवास योजनेतील सर्व लाभार्थ्यांना याद्वारे मोफत वीजपुरवठा होणार आहे,’ अशी घोषणा मुख्यमंत्री देवेंद्र फडणवीस यांनी रविवारी केली.
सामाजिक न्याय व विशेष सहाय्य विभाग आणि प्रधानमंत्री खनिज क्षेत्र कल्याण योजनेअंतर्गत सहाय्यक आयुक्त, समाज कल्याण नागपूरतर्फे जिल्ह्यातील गरजू दिव्यांग व्यक्तींना स्वयंरोजगाराची संधी उपलब्ध करून देण्याच्या उद्देशाने ई-रिक्षा वाटप कार्यक्रमाचे आयोजन केले होते. यावेळी मुख्यमंत्री देवेंद्र फडणवीस बोलत होते.
मंचावर महसूलमंत्री तसेच जिल्ह्याचे पालकमंत्री चंद्रशेखर बावनकुळे, इतर मागास बहुजन कल्याण मंत्री अतुल सावे, राज्यमंत्री आशिष जयस्वाल, खासदार श्यामकुमार बर्वे, आमदार डॉ. आशिष देशमुख, आमदार चरणसिंग ठाकूर, आमदार मोहन मते, आमदार डॉ. परिणय फुके, आमदार संजय मेश्राम आदी उपस्थित होते.
या उपक्रमाअंतर्गत नागपूर जिल्ह्यातील एकूण ५५५ गरजू दिव्यांग लाभार्थ्यांना ई-रिक्शा, मोटराइज्ड ट्रायसिकल, ई-किराणा रिक्षा, ई-भाजीपाला रिक्षा, फूड कार्टचे वाटप करण्यात आले. तसेच या कार्यक्रमात ‘घर-घर संविधान’ या उपक्रमांतर्गत संविधान प्रास्ताविकेचे वाटप आणि कर्मवीर दादासाहेब गायकवाड सबळीकरण व स्वाभिमान योजनेअंतर्गत जमिनीचे ७/१२ उतारे वाटप कॉफी टेबल बुक, चॅटबोट आणि ऍडव्हेंचर पार्कचे उद्घाटन झाले.
