जिल्ह्यातील ४ माजी आमदार भाजपच्या वाटेवर, फडणवीसांसोबत खलबते
अजित पवार गट, कॉंग्रेसला धक्का?
सोलापूर : प्रतिनिधी
सोलापूर जिल्ह्याच्या राजकारणात मोठी उलथापालथ होणार आहे. माजी आमदार बबनदादा शिंदे, राजन पाटील, यशवंत माने आणि दिलीप माने यांच्यासह अनेक नेते, पदाधिकारी ऐन दिवाळीत भाजपमध्ये प्रवेश करण्याची शक्यता आहे. त्यामुळे कॉंग्रेस, राष्ट्रवादी कॉंग्रेस अजित पवार गटाला धक्का बसण्याची शक्यता आहे. दरम्यान, या राजकीय नेत्यांसोबत कार्यकर्तेही मोठ्या संख्येने भाजपमध्ये दाखल होण्याची शक्यता आहे. ऐन दिवाळीत प्रवेशाचा धमाका होऊ शकतो, अशी शक्यता वर्तवली जात आहे.
राष्ट्रवादी अजित पवार गटाचे नेते आणि माढ्याचे माजी आमदार बबन शिंदे हे सध्या अमेरिकेत उपचाराधीन असले तरी त्यांचे पुत्र रणजित शिंदे आणि विक्रम शिंदे हे मुख्यमंत्र्यांच्या संपर्कात आहेत. राजन पाटील आणि यशवंत माने हे राष्ट्रवादी काँग्रेस अजित पवार गटामधून तर दिलीप माने हे काँग्रेसमधून भाजपमध्ये प्रवेश करण्याची शक्यता आहे.
या राजकीय हालचालीनंतर महाविकास आघाडीवर विश्वास राहिला नसल्यामुळेच भाजपमध्ये प्रवेश होत आहेत, असे भाजप नेते चंद्रशेखर बावनकुळे यांनी म्हटले आहे. पालकमंत्री जयकुमार गोरे यांच्या पुढाकाराने मुख्यमंत्री देवेंद्र फडणवीस यांच्यासोबत वर्षा बंगल्यावर गुरुवारी रात्री उशिरा एक गुप्त बैठक पार पडली. आगामी स्थानिक स्वराज्य संस्थांच्या निवडणुका लक्षात घेता भाजपने ही मेगा भरती सुरू केली आहे. महाविकास आघाडी केवळ राजकीय मुद्यांवर चर्चा करत असून विकासापासून दूर गेली आहे तर महायुती सरकार विकासाच्या अजेंड्यावर काम करत असल्याने अनेक नेते भाजपमध्ये येत असल्याचा दावा बावनकुळे यांनी केला.
स्थानिक स्वराज्य संस्थांच्या निवडणुका लक्षात घेऊन काही नेते पक्षात सामील होत आहेत. मोहोळ तालुक्यात राजन पाटील यांची मोठी ताकद असून, त्यांच्या प्रवेशाने भाजपला या भागात बळकटी मिळेल. आगामी निवडणुकांमध्ये पक्षाला यशस्वी करण्यासाठी मुख्यमंत्री महोदय स्वत: नियोजन करत आहेत आणि या अनुषंगाने संबंधितांचे पक्षप्रवेश लवकरच होतील, असे सूत्रांनी सांगितले.
