लातूर : प्रतिनिधी
लातूर जिल्ह्यात वाढत असलेल्या रस्ते अपघातांच्या पार्श्वभूमीवर नागरिकांच्या जीविताचे संरक्षण करण्यासाठी प्रशासन व लातूर पोलीस विभागाकडून विविध उपाययोजना राबविण्यात येत आहेत. दि. १९ ऑगस्ट २०२६ रोजी जिल्हाधिकारी, लातूर यांच्या अध्यक्षतेखाली झालेल्या जिल्हा रस्ता सुरक्षा समितीच्या बैठकीत जिल्ह्यातील दुचाकीस्वारांसाठी दि. १ सप्टेंबरपासून हेल्मेट वापरणे सक्तीचे करण्याचा निर्णय घेण्यात आला आहे. लातूर पोलीस विभागाने वर्षाच्या सुरुवातीपासूनच अपघातांमधील जीवितहानी कमी करण्यासाठी जनजागृती तसेच कायदेशीर कारवाईवर भर दिला आहे. लातूर जिल्हा पोलीस सहकारी पतसंस्थेच्या माध्यमातून सुमारे १,५०० पोलीस अधिकारी व अंमलदारांना मोफत हेल्मेटचे वाटप करण्यात आले.
या उपक्रमाचे महत्त्व अधोरेखित करणारी घटना म्हणजे रेणापूर पोलीस ठाण्यातील पोलीस अंमलदार विश्वास जाधव हे कर्तव्य बजावून दुचाकीवरून लातूरकडे येत असताना त्यांच्या दुचाकीला मागून इंडिका कारने जोरदार धडक दिली. अपघात गंभीर असतानाही त्यांनी हेल्मेट परिधान केलेले असल्यामुळे त्यांचा जीव वाचला. यातून हेल्मेट हा केवळ कायद्याचा भाग नसून जीवन वाचविणारे सुरक्षा कवच आहे, हे स्पष्ट होते.
लातूर जिल्ह्यातील २३ पोलीस ठाण्यांच्या हद्दीत ‘प्रवास सुरक्षित करा—हेल्मेट वापरा’ या संदेशातून व्यापक जनजागृती करण्यात आली आहे. अपघातग्रस्त वाहने रस्त्याच्या कडेला ठेऊन नागरिकांना अपघातांचे गांभीर्य समजावून सांगण्यात आले. त्याचबरोबर विना हेल्मेट तसेच विना सीटबेल्ट वाहन चालविणा-या चालकांवर कायदेशीर कारवाईही करण्यात आली आहे.
मात्र, जनजागृती व कारवाई करूनही अपघातांचे प्रमाण चिंताजनक आहे. चालू वर्षात लातूर जिल्ह्यात आतापर्यंत ५२८ रस्ते अपघात झाले असून त्यामध्ये २४३ जणांना आपला जीव गमवावा लागला आहे. विशेषत: दुचाकी चालविताना हेल्मेटचा वापर न केल्यामुळे अनेकांना गंभीर दुखापतींसह प्राण गमवावे लागले आहेत. याउलट अपघाताच्या वेळी हेल्मेट व सीटबेल्टचा वापर करणा-या अनेक नागरिकांना दुखापत झाली असली तरी त्यांचा जीव वाचला आहे. त्यामुळे दि. १ सप्टेंबरपासून हेल्मेट सक्ती हा केवळ नियम किंवा दंडाची बाब न समजता प्रत्येकाने आपल्या आणि आपल्या कुटुंबाच्या सुरक्षिततेची जबाबदारी म्हणून त्याकडे पाहावे.
