२ आठवड्यांत उत्तर द्या, खासदार, लोकसभा अध्यक्षांना आदेश
नवी दिल्ली : वृत्तसंस्था
शिवसेना ठाकरे गटाच्या ६ खासदारांनी शिवसेना शिंदे गटात प्रवेश केला होता. या खासदारांच्या गटाच्या विलिनीकरणाला लोकसभा अध्यक्षांनी अधिकृत मान्यता दिली होती. त्यानंतर लोकसभा अध्यक्षांच्या या निर्णयाविरोधात शिवसेना ठाकरे गटाने सु्प्रीम कोर्टात धाव घेतली होती आणि लोकसभा अध्यक्षांनी दिलेल्या निर्णयाला स्थगिती देण्याची मागणी केली होती. मात्र, सुप्रीम कोर्टाने लोकसभा अध्यक्षांच्या निर्णयाला स्थगिती देण्यास नकार दिला. यावर लोकसभा अध्यक्ष आणि ६ खासदारांनी २ आठवड्यात उत्तर द्यावे, असा आदेश सुप्रीम कोर्टाने दिला.
सुप्रीम कोर्टाच्या या निर्णयामुळे उद्धव ठाकरे यांना मोठा धक्का बसला. दुसरीकडे शिवसेना शिंदे गटाचे सर्वेसर्वा आणि उपमुख्यमंत्री एकनाथ शिंदे यांना मोठा दिलासा मिळाला. शिवसेना पक्षात पडलेल्या फुटीनंतर दुसरी मोठी बंडखोरी काही दिवसांपूर्वीच शिवसेना ठाकरे गटात झाल्याचे पाहायला मिळाले. शिवसेना ठाकरे गटातील ९ खासदारांपैकी तब्बल ६ खासदारांनी उद्धव ठाकरे याची साथ सोडली. त्यांनी शिवसेना शिंदे गटात प्रवेश केला. त्यामुळे राज्यात शिवसेना शिंदे गटाची ताकद वाढली. कारण शिवसेना शिंदे गटाकडे असलेल्या खासदारांचा आकडा १३ वर पोहोचला आहे.
६ खासदार ठाकरे गटातून बाहेर पडल्यानंतर लोकसभा अध्यक्षांनी या खासदारांच्या शिवसेना शिंदे गटातील विलिनीकरणाला परवानगी दिली होती. लोकसभा अध्यक्षांकडून विलिनीकरणाला परवानगी मिळाल्यानंतर शिवसेना ठाकरे गटाकडून सुप्रीम कोर्टात धाव घेतली होती आणि लोकसभा अध्यक्षांच्या या निर्णयाला स्थगिती देण्यात यावी, अशी मागणी केली होती. परंतु सुप्रीम कोर्टाने लोकसभा अध्यक्षाच्या निर्णयाला स्थगिती देण्यास नकार दिला. मात्र, यासंदर्भात लोकसभा अध्यक्ष आणि सहा खासदारांनी दोन आठवड्यात उत्तर द्यावे, असे कोर्टाने म्हटले आहे.
