उदगीर : प्रतिनिधी
उदगीर ही लढवयांची भूमी असून नगर परिषदेत महाविकास आघाडीचे नगराध्यक्ष व नगरसेवक निवडून आणून ३ डिसेंबरला नगरपालिकेत नवा इतिहास घडवा, असे आवाहन राज्याचे माजी वैद्यकीय शिक्षण सांस्कृतिक कार्यमंत्री व लातूर जिल्ह्याचे माजी पालकमंत्री तथा महाराष्ट्र विधिमंडळ काँग्रेस पक्षाचे मुख्य प्रतोद आमदार अमित विलासराव देशमुख यांनी केले.
उदगीर नगरपरिषदेच्या निवडणुकीतील काँग्रेस महाविकास आघाडीचे नगराध्यक्षपदाचे उमेदवार व सदस्यपदाच्या उमेदवारांच्या प्रचारात उदगीर येथे दि. २८ नोव्हेंबर रोजी आयोजित विराट सभेत माजी मंत्री, आमदार अमित विलासराव देशमुख बोलत होते. यावेळी खासदार डा.ॅ शिवाजी काळगे, शिवसेना उद्धव बाळासाहेब ठाकरे पक्षाचे कैलास पाटील, लातूर जिल्हा काँग्रेसचे अध्यक्ष अभय साळुंके, प्रदेश काँग्रेसचे सचिव कल्याण पाटील, महाविकास आघाडी उदगीर नगर परिषद सार्वत्रिक निवडणुकीतील नगराध्यक्ष पदाचे अधिकृत उमेदवार डॉ. अंंजूम कादरी, राष्ट्रवादी काँग्रेस शरद पवार पक्षाचे प्रदेश सरचिटणीस बसवराज पाटील नागराळकर, श्रीमती लक्ष्मीताई भोसले, प्रीतीताई भोसले, ट्वेन्टी वन शुगरचे व्हाईस चेअरमन विजय देशमुख, उदगीर काँग्रेसचे निरीक्षक रवींद्र काळे, उदगीर तालुका काँग्रेस कमिटीचे अध्यक्ष संतोष बिराजदार, शीलाताई पाटील, आशिष पाटील, मंजूरखा पठाण, मारुती पांडे, पद्माकर उगीले, नाना ढगे, विवेक जाधव, चंदन पाटील नागराळकर, मधुकर एकुरगेकर, कनिष्क शिंदे, लकी पाटील मेहबूब शेख, सरोजाताई बिरादार, श्रीकांत पाटील आदिसह काँग्रेस पक्षाचे, महाविकास आघाडीचे विविध पदाधिकारी कार्यकर्ते, नागरिक उपस्थित होते.
पुढे बोलताना माजी मंत्री, आमदार अमित देशमुख म्हणाले, भारतीय जनता पक्षाने मागच्या वेळी उदगीर नगरपरिषद निवडणूक जिंकण्यासाठी ज्या तंत्राचा अवलंब केला तेच तंत्र यावेळी अवलंबण्याचा त्यांनी प्रयत्न चालवला आहे. मात्र यावेळी काँग्रेस पक्षाने उमेदवारी निवडीपासूनच सावध पावले टाकले आहेत. मत विभाजन होणार नाही याची काळजी घेतली आहे. नगराध्यक्ष पदासाठी सुशिक्षित, प्रगल्भ विचाराच्या आणि नागरिकांच्या समस्याची जाण असलेल्या डॉ. अंजुम कादरी यांना उमेदवारी दिली आहे. नगरसेवक पदाचे उमेदवार देताना सर्व समाज घटकांना न्याय देण्याचा प्रयत्न केला आहे.
राष्ट्रवादी काँग्रेस (शरद पवार) पक्षाचे नेते बसवराज पाटील नागराळकर यांनीही आता नगराध्यक्षपदासाठी काँग्रेस उमेदवारांना मतदान करण्याचे आवाहन केले आहे. काँग्रेसपासून दुरावलेले काही नेतेमंडळीचाही काँग्रेस उमेदवारांना पाठिंबा मिळत आहे. या परिस्थितीत भारतीय जनता पक्ष आणि राष्ट्रवादी काँग्रेस (अजित पवार गट) यांच्या आघाडीचा जनाधार दिवसेंदिवस कमी होत आहे. त्यामुळे धनशक्तीचा वापर करून मत विकत घेण्याचे आणि सर्वधर्मसमभाव मांडणा-या जनतेचे मतविभाजन करण्यासाठी त्यांनी प्रयत्न चालवले आहेत. त्यांचे हे प्रयत्न कोणत्याही परिस्थितीत यशस्वी होणार नाहीत याची दक्षता आपण सर्वांनी मिळून घ्यावी, असे आवाहने याप्रसंगी केले आहे.
