निलंगा : प्रतिनिधी
निलंगा नगरपालिकेच्या निवडणुकीच्या रणधुमाळीत काँग्रेसच्या उमेदवाराच्या प्रचारार्थ महिला सरसावल्या आहेत. काँग्रेसचे जिल्हाध्यक्ष अभय साळुंके यांच्या पत्नी सौ. अस्मिता अभय साळुंके यांच्यासह महिलांनी काँग्रेसचे नगराध्यक्ष पदाचे उमेदवार हमीद शेख यांच्यासह २३ नगरसेवक पदाच्या उमेदवाराच्या प्रचारार्थ दि २८ नोव्हेंबर शुक्रवार रोजी शहरात मतदारांच्या भेटी घेत काँग्रेसचे विचारधारा पटवून देत रॅली काढण्यात आली. या रॅलीस शहरातील मतदारांनी उत्स्फूर्त प्रतिसाद दिल्याने काँग्रेस पक्षाने प्रचारार्थ आघाडी घेतली आहे.
निलंगा नगरपालिकेच्या निवडणुकीचा प्रचार शिगेला पोहोचला असून सर्वच पक्षांनी शहरात प्रचाराचा धुमधडाका उडवला आहे. सर्वच राजकीय पक्षांच्या नेत्यासह पदाधिकारी, कार्यकर्त्यांनी, उमेदवारांनी, व अपक्ष उमेदवारांनी प्रचारार्थ चांगलीच रंगत भरली आहे. मतदारांना भेटून आपापल्या पक्षांची विचारधारा पटवून देत आम्हीच शहरांचा सर्वांगीण विकास करू शकतो, असे मतदारांना पटवून देत प्रचार यंत्रणेत रंगत भरली आहे. त्यातच दि २८ नोव्हेंबर शुक्रवार रोजी काँग्रेसचे नगराध्यक्ष पदाचे उमेदवार हमीद शेख यांच्यासह २३ नगरसेवक पदाच्या उमेदवाराच्या प्रचाराकरिता महिला सरसावल्या. यात काँग्रेसचे जिल्हाध्यक्ष अभय साळुंके यांच्या पत्नी सौ. अस्मिता अभय साळुंके यांच्यासह महिला पदाधिकारी व कार्यकर्त्यांनी शहरात मतदारांना पक्षाची विचारधारा पटवून देत आहेत.
काँग्रेस पक्षाचे उमेदवार इतर उमेदवारांपेक्षा सरस असून त्यांना शहराच्या विकासाची जाण आहे. सत्ताधा-यांच्या कालखंडामध्ये शहरामध्ये मूलभूत सुविधांचा बोजवारा उडालेला आहे. यामुळे निलंगा शहराच्या सर्वांगीण विकासाकरिता काँग्रेस पक्षाच्या नगराध्यक्ष पदाच्या उमेदवारासह २३ नगरसेवक पदाच्या उमेदवारांना भरघोस मताने विजयी करून शहराचा विकास होण्याकरिता मतदारांनी हातभार लावावे असे आवाहन करीत शहरात डोअर टू डोअर जाऊन मतदारांच्या भेटी घेण्यात आल्या.
काँग्रेस पक्षाच्या उमेदवाराच्या प्रचारार्थ काढण्यात आलेल्या महिलांच्या रॅलीस शहरातील मतदारांनी उत्स्फूर्त प्रतिसाद मिळाला. यामुळे काँग्रेसचे नगराध्यक्ष पदाचे उमेदवार हमीद शेख यांच्यासह नगरसेवक पदाच्या २३ उमेदवारांनी प्रचारार्थ आघाडी घेतली असल्याचे चित्र पाहावयास मिळते. यावेळी सौ अस्मिता अभय साळुंके, यांच्यासह अमिना हमीद शेख, सौ रिशा अजित नाईकवाडे , नगरसेवक पदाच्या उमेदवार मनीषा सुनील नाईकवाडे , अनुसया तानाजी सावरे, जयश्री शिवाजी सावरे ,सारिका राजकुमार नाईकवाडे, शकीला अखिल शेख, कमल दत्ता नलवाडे, वनिता विकास नलवाडे, केशाबई अनिल सावरे आदीसह महिला काँग्रेसचे पदाधिकारी व कार्यकर्ते रॅलीत सहभागी होते.
