नांदेड : प्रतिनिधी
नशा निर्माण करणा-या गोळ्यांची अनधिकृतपणे आणि खुलेआम विक्री करणा-या दोन औषधी दुकानदारांचा गैरकारभार वजीराबाद गुन्हे शोध पथक व अन्न औषधी प्रशासन विभागाने उघड केला आहे. डॉक्टरांच्या चिठ्ठीशिवाय, कोणतेही बील न देता नशेच्या गोळ्या विकणा-या ऑक्सिजन मेडिकल बाफनासह दत्तनगर येथील हेल्थ ओके मेडिकल दुकानांरा रंगेहात पकडून कारवाई करण्यात आली आहे.
वजीराबाद पोलीस ठाण्याचे गुन्हे शोध पथक दिनांक २३ मे रोजी शहरात पेट्रोलिंग करत होते त्यावेळी दोन औषधे दुकानदार प्रीगाबालिन कॅप्सुल या नशेच्या गोळ्या विक्री करत असल्याची माहिती मिळाली होती. या माहितीच्या आधारे वजीराबाद ठाण्याचे पोलीस निरीक्षक परमेश्वर कदम, सहायक पोलीस निरीक्षक सुनील बुलंगे यांच्यासह गुन्हे शोध पथकाच्या कर्मचा-यांनी बनावट गि-हाईक तयार करून सापळा रचला.
या अंतर्गत बाफना येथील ऑक्सिजन मेडिकल व दत्तनगर येथील हेल्थ ओके मेडिकल या औषधी दुकानावर नशा निर्माण करणा-या प्रीगाबालिन कॅप्सुल या गोळ्यांची कोणत्याही चिठ्ठीशिवाय मागणी केली. तेव्हा दोन्हीही औषध दुकानात हजर असलेल्या व्यक्तींनी या नशा निर्माण करणा-या गोळ्या सहजरित्या उपलब्ध करून दिल्या. यानंतर औषधी विभागाचे सहाय्यक आयुक्त अशोक राठोड यांनी दोन्ही दुकानांचे तपासणी केली. त्यावेळी ३८ हजार ३८ रुपयांच्या १५४० गोळ्या आढळून आल्या या सर्व गोळ्या जप्त करून दोन्ही दुकानदारांवर पोलीस ठाणे अंतर्गत कारवाई करण्यात आली आहे.
